Vaikke politiija lea olu jagiid nammaduvvon bušeahttavuoitin, de gártet politiijameaštárat sakka seastit. Finnmárkku politiijameaštárat leat 2003:a rájes manahan válddi masá 20 miljovnna ruvdnui, dát čuohcá álbmogiid.
Norgga 27 politiijaguovllu ožžo badjel logi miljárddaga ruvnnu dán jagi politiijabušeahtas, ruhta lea masá beliin lassánan 2003:a rájes. Seamma áigodagas leat Norgga politiijameaštárat massán 515 miljovnna ruvnnu iežaset hálddus, čállá Politiforum. Oarje-Finnmárkku politiijameaštár lea gártan seastit 12.412.957 ruvnnu ja nuorta-Finnmárkku politiijameaštár ges 6.545.245 ruvnnu.
Masset válddi
Masá bealli Norgga politiijaguovllu bušeahtta lassáneamis geavahuvvo hadde- ja bálkálasáhusaide, ja stuora oassi nuppi bealis ges geavahuvvojit bealljemerkejuvvon doaimmaide dego ovdamearkkadihti ođđa politiijavirggiide, fievrrideapmái ja mánáidviesuide.
– Mii leat ožžon golbma ođđa politiijavirggi dán jagi, muhto bealljemerkejuvvon ruđat mielddisbuktet ahte mun in beasa vuoruhit masa galgat geavahit ruđaid. Dát dieđusge čuohcá politiijadoibmii ja njiedjan lea dramatálaš. Dušše dán jagi leat gártan seastit gaskal 4-5 miljovnna ruvnnu, lohká Oarje-Finnmárkku politiijameašttir Morten Daae.
Maŋidit biilaoastima
Oarje-Finnmárkku politiijameašttir lohká seastima čuohcat álbmogiid, muhto sii geahččalit fállat nu buori politiijabálvalusa go nagodit.
– Olbmot diehttelasat fuomášit ahte politiijat eai leat seamma oidnosis go ovdal. Mii dáhtut dattege fállat buori politiijabálvalusa, ja danin leat earret eará mearridan maŋidit biilaoastima. Mii áigguimet geavahit golbma miljovnna ruvnnu ođđa fievrruide, muhto mii vuordit dáinna boahtte jahkái. Finnmárkkus leat guhkes gaskkas ja danin fertejit mis buorit biillat, muhto mis lihkkus leat biillat maiguin birget, čilge Daae.
Rievdadit vuogádaga
Politiijameašttir lea geahčadišgoahtán man láhkai sáhttá čoavdit ruhtadilálašvuođa buoremus lági mielde. Son muitala ahte máksá viehka olu jus galgá gohčut politiijaid badjeláiggibargui jus juoga dáhpáhuvvá eahkedis dahje ihkku, danin leat jo Oarje-Finnmárkku politiijaguovllu máttaoasis ásahan ođđa vuogádaga. Álttás, Láhpis ja Guovdageainnus leat birra jándora politiijat barggus.
– Jus juoga dáhpáhuvvá dáid guovlluin, de lea jo politiija barggus ja mun in dárbbaš máksit badjeláiggi bálkkáid. Aktiivabálvalusain seastit ruđaid, muhto dađibahábut sáhttá politiija ádjánit johtit nuppi báikái. Jus Guovdageainnus dáhpáhuvvá juoidá, de han ferte politiija vuolgit Álttás, muitala Daae. ja lasihastá ahte fertejit árvvoštallat miehtá politiijaguovllu ásahit seamma doaimma.
Vel eanet seastit
Dál ferte politiijameašttir árvvoštallat galgá go ásahit aktiivabálvalusa miehtá politiijaguovllu. Vaikke Oarje-Finnmárkkus leat doarvái politiijat, de šaddá dárbu vel eanet virggiide jus politiijat galget barggus 24 diimmu jándoris. Oarje-Finnmárkku politiijameašttir Morten Daae ballá ahte dilli šaddá vel vearrát boahtte áiggis.
– Jáhkkán politiijameaštáriid bušeahtta gáržu vel eambbo boahtte jagi, dalle han mii galgat ruhtadit ođđa heahtefierpmádaga. Dađibahábut šaddá boahtte áigi vel váddáset. Muhtimat vásihit dán dál jo kriisan, muhto nu ii leat vel, lohká son.
Nuorta-Finnmárkku politiijameašttir Ellen Katrine Hætta. Vuorkágovva: Astrid Helander
– Dárbu, muhto čuohcá midjiide
Politiijameaštárat vuoittahallet go ruhtaváldi sirdašuvvá Politiijadirektoráhtii. Nuorta-Finnmárkku politiijameašttir, Ellen Katrine Hætta, oaidná dárbbu hukset Politiijadirektoráhta fágalaččat.
– Dat ii leat ovdalaččas doarvái buorre, ja fágagivrodat boahtá ávkin politiijaguovlluide. Dát bargu máksá, muhto dasa lea dárbu, lohká son.
Nuorta-Finnmárkku politiijameašttir muitala ahte sii čuvvot addojuvvon bušeahta, muhto ahte gáržžideapmi čuohcá.
– Dát váikkuha kriminálaeastadanbargui ja gearggusvuhtii, ja eat ge mii leat seamma oidnosis go politiija berre. Lea áibbas čielggas politiijabálvalus hedjona seastima geažil. Mii eat vel dieđe gokko seastit, leat geahčadeamen dan, lohká Hætta.
