Deanu SáB politihkkáris Káre Elle Partapuolis ja Deanu Bb politihkkáris Mariann J. Lindis leat unna mánážat mielde čoahkkimis.
Deanu SáB politihkkár Káre Elle Partapuoli ja Deanu Bb politihkkár Mariann J. Lindi leigga goappašagat váldán mielde iežaska unna mánáža Fuolahus, bajásšaddan ja kultuvrra váldolávdegotti čoahkkimii maŋŋebárgga. Fargga golbma mánu dassái go soai leigga oktanaga bohcciviesus, lea dušše beaivi gaska sudno unna gánddažiid.
– Nicolai lea fargga golbma mánnosaš ja dát lea su vuosttaš čoahkkin, dadjá Mariann J. Lindi.
Beaivi gaska
Politihkkár guovttos leigga oktanaga buohcciviesus ja lea dušše beaivi gaska gánddažiid.
– Mu mánná maid lea fargga golbma mánnosaš ja su namma lea Áigin Nubá ja sus maiddái lea dát su vuosttaš čoahkkin ja soai leaba riegádan dušše beaivi gaska, nu moai ledne leamaš buohcciviesus maiddái fárrolága, dadjá Káre Elle Partapuoli.
– Ferte mannat
Lindi muitala sus ferte mannat bures go lea mánná mielde čoahkkimis.
– Dat ferte dušše mannat bures, mus lea hárjáneapmi dasa ovdalis, muhto lea mannan hui bures ja dat lea diehttelas ahte mus lea mielde mánáš, dadjá Lindi.
Gietkamis
Partapuoli muitala lea mannan bures vaikke lea mánná mielde čoahkkimis ja mánná oađđá bures gietkamis.
– Mu mielas maid lea mannan hui bures, mun lean bidjan máná gietkamii, go son oađđá nu bures gietkamis ja sutnje lea nu dorvvolaš oađđinsadji. Ii leat čirron nu ollu, ii leat eará go njimadan go sus lea nealgi, dadjá Partapuoli.
Menddo unni
Soai lohkaba mánážat leat menddo unni guođđit earáid háldui go soai leaba čoahkkinis.
– Soai leaba ain nu unni ahte eaba sáhte báhccit earáid lusa dan botta go lea čoahkkin, nu lea buoremus ahte leaba mielde, dadjaba Partapuoli ja Lindi veahkkálaga.
