Romssa politiijaguovlu lea dutkagoahtán ášši.
Finnmárkku politiijameašttir Ellen Katrine Hætta oaččui mánnodaga dán vahkku dieđu ahte muhtun bargi politiijaguovllus lea váidon ja dutkojuvvo seksuála illasteamis iežas lagas olbmo vuostá.
Finnmárkku politiijaguovlu ii leat mielde dutkamis ášši, ii ge dovdda sisdoalu váidagis.
Bargiidášši
Finnmárkku politiijaguvlui lea dat bargiidášši, ja váidda dutkojuvvo Romssa politiijaguovllus.
Dát bargi lea ožžon eará, hálddahuslaš bargguid politiijaguovllus, bargguid mat eai guoskka politiijabargui ja gulahallamii olbmuiguin.
Duođaštit ahte lea sáhka bearašláhtus
Romssa politiijaguovllu politiijaadvokáhtta Aase Widding duođašta ahte sii dál barget váidagiin.
– Mii dutkan ráŋggáštanášši mii guoská lagas olbmo illasteapmái, dadjá son NRK:i.
– Lagas olmmoš, lea go bearašlahtus sáhka?
– Juo, dan gal sáhtán duođaštit. Eará kommentára ii leat, vástida Widding NRK:i.
