Dilihisvuođas sáhttet gártat ártegis ságat. Muhtin fearániid ii olmmoš hálit oba muitit ge.
Dilihisvuođas sáhttet gártat ártegis ságat. Muhtin fearániid ii olmmoš hálit oba muitit ge.
Otná lávvardatsáhkan jurddašin min lohkkiide muitalit veahá journalisttaid árgabeaivvis. Dat lea dakkár árgabeaivi gos álot lea dilihisvuohta ja áigemearit maid galggašii joksat.
Deadline, deadline, deadline. Dat lea álot 11.30 áigge, vaikke mo dal de livččii. Nu sáhttet ge čállosiin ihttit ártegis meattáhusat ja somás ságat.
Erna Solberg namma sáhttá gártat Erna Stoltenbergan (huff). Gal dat lei váivi nuppe beaivve go fuomášin áviissas, muhto dál maŋŋil gal sáhtán čaibmat.
Muhto eai leat dušše diekkár dábálaš čállinmeattáhusat mat sáhttet geavvat. It dárbbaš eará go vajáldahttit ovtta sáni čállit, ja de šaddá olles čálus oalle somán. Das dat boahtá ge dat bajilčála, okta fearán man birra dál jurddašin muitalit.
Duos dás ain bohtet min doaimmahussii cavgileamit áššiid birra. Nu dagai dán vuoro maid. Lei oainnat nu ahte Guovdageainnus vásihedje olbmot ahte sin poasttat biddjojedje boasttu poastakássaide duos dás ain.
Diet dat gal orui vuogas báikkálaš ođasášši, ja nu mii dagaimet jearahallamiid ja nu ain.
Muhto de lei dat min čálus. Leimmet jearahallan ovtta nissonolbmo guhte muitalii mo son lea vásihan moivvi, ja de boahtá ge sitáhta:
«– Vearrámus lea go nagodit Ávžži dievddu, geas ii leat seamma goargu ge go mus, bidjat mu poastakássii.»
De ha ban lei ge, reivve-sátni váilui ja ášši deaddiluvvui nu ahte ii oktage fuomášan dien meattáhusa, ovdal go nuppe beaivvi go olbmot juohkigohte ášši facebook bokte.
Erenoamáš somán šattai várra guovdageaidnulaččaide, go Ávžži dievddut leat vissa beakkánat go galget leat oalle rávvásat, eai ge nu álkit dáidde čahkat poastakássii.
Jaja, dál de beassabehtet dien fas čaibmat ja digaštallat. Buorre vahkkoloahppa!
Juohke lávvardaga almmuhat mii «Lávvardatságaid», háliidat go don čállit koseriija dahje hearvásčállosa vaikke man birra? Sáddes čállosa midjiide redaksjonen@avvir.no e-poastačujuhussii.
