Eanodaga gielda mearrida dán čavčča juolludit go ruđa ođđa máŋggadoaimmat dállui Suoma beal Gárasavvonii.
Máŋggadoaimmat dálus galgá šaddat earret eará skuvla, muhto dállu galgá maid heivehuvvot eará doaimmaide.
– Gárasavvon dárbbaša ođđa skuvlla. Livččii buorre, jus doppe livččii maid beaiveruoktu ja sadji nuoraide ja boaresolbmuide. Seammás dat livččii maiddái giliviessu, gos olbmot sáhttet doallat kurssaid. Ja maid valáštallanhálla, čilge váhnen Tytti Valkeapää Yle Sápmái.
Eanodaga gielddahoavda Jari Rantapelkonen muitala, ahte váldostivra mearrida dán čavčča áigge Gárasavvona ođđa máŋggadoaimmadálu plánenruđas.
– Jurdda lea dat, ahte boahtte jagi áiggi livččii vejolaš dan plánet, jus gieldda mearrideaddjit nu háliidit. Plánema olis de ferte smiehttat, ahte man stuoris dat dállu livččii ja makkár dárbbuide dat vástida. Ahte leago dat dušše skuvlla ja beaivedivššu várás vai bohtetgo dasa vel earáge doaimmat, čilge Rantapelkonen Yle Sápmái.
