Gálloga miellačájeheaddjit čállet iežaset neahttasiiddus ahte galgá miellačájáhus Gállogis olggobealde Johkamohki čakčageasi go Gálloga fas fysalaččat áitá Beowulf ruvkefitnodat.
Lei 2013 geasi olusat čájehedje vuostehágu Beowulf ruvkeplánaide Gállokis.
Eŋglándda fitnodat Beowulf lea ohcan rogganlobi ásahit ruovdemálbmaruvkke Gállogii Johkamohki oarjjabealde. Diimmá golggotmánus bođii diehtu ahte Beowulf mining ruvkefitnodat lea čállán šiehtadusa Ruoŧa GeoVista AB:in vai sii sáhttet iskat geofysalaš dieđuid ja maid ohcagoahtit Párkijávrris. Ohcamat mat leat plánejuvvon álggahuvvojit 2020 čavčča.
Dál lea miellačájáhus plánejuvvon borgemánnui, čállá kolonierna iežaset neahttasiiddus.
– Lehket gergosat meahcceleirii čakčageassái, čállet sii.
