Davvi-Norgga Universitehtabuohcceviessu bidje pasieanttaid ja bargiid persovnnalaš dieđuid nugo namaid ja personnummariid internehttii.
Persovnnalaš dieđut ledje oidnosis boasttalisttus miessemanu 7. beaivvi, eanas dieđut ledje pasieantavahátbuhtadusáššit, čalla Nordlys aviisa.
Dábálaččat lávejit persovnnalaš ja sensitiiva dieđuid čiehkat ovdal go bidjet almmolaš boasttalisttuide.
Davvi-Norgga Universitehtabuohcceviesu direktevra Anita Schumacher váldá ášši duođalaččat.
– Duođalašvuohta dán áššis lea ahte leat olbmot geaid sáhttá identifiseret. Dat lea šáhka čállosiid birra mat leat bajilčáladásis, go čuočču namma, personnummár ja ovdamearka dihte ‘’ Fuolastusdiehtu mánáidsuodjalussii’’ dahje ‘’ Pasieanttavahátbuhtadus ášši’’, de mun oaivvildan dan vuođul ahte dat lea hui duođalaš ášši, dadjá Schumacher Nordlys aviisii.
Schumacher muitala ahte lea sáhka 95 registrerejuvvon dieđuin mat leat bidjon nehttii nuvt dieđut eai lean čihkkon. Dieđut ledje almmolaččat beannot jándora.
Buohcceviessu lea dieđihan Datatilsynetii ášši birra ja dat čajehuvvo ahte lea sihke teknihkalaš ja olmmošlaš sivva.
(©NTB)
