-Almmuhus-
OĐĐASATPer-Olof Nutti válljejuvvon stivraságadoallin

Per-Olof Nutti válljejuvvon stivraságadoallin

-

-

Dál lea čielgan ahte Ruoŧa beale Sámedikkis šaddá ođđa jođiheapmi. Per-Olof Nutti doaibmagoahtá dál presideantan, ja fárus lea sus ođđa stivra.

– Min ovttasbargu mearkkaša ahte mis šaddá dássedis eanetlohku min oktasaš politihkkii. Mii leat šaddan ovttaoaivilii das makkár politihkalaš áŋgiruššan mis galgá leat boahttevaš mandáhttaáigodagas, lohká Per-Olof Nutti preassadieđáhusas.

Son válljejuvvui stivraságadoallin, man maiddái lávejit gohčodit sámediggepresideantan.

Ovddeš opposišuvdnabellodagat Sámeeatnanbellodat, Guovssonásti ja Vuovdega-Skogssamerna válde fámu, Samerna ja Samiska folkomröstningspartiet vehkiin.

 

Ovttasbargu

Ovdal go go dievasčoahkkin jotkkii gaskabeaiáiggiid, de dieđihedje dát bellodagat ahte leat ásahan válgateknihkalaš ovttasbarggu.

Ruoŧa Sámedikki ođđa stivra:

  • Per-Olof Nutti, Samelandspartiet
  • Britt Sparrok, Samelandspartiet
  • Lars-Miguel Utsi, Guovssonásti
  • Marita Stinnerbom, Guovssonásti
  • Lars W. Svonni, Samiska folkomröstningspartiet
  • Jan Rannerud, Vuovdega
  • Anders Kråik, Samerna

Stivrra válljen čađahuvvui dakka maŋŋel diibmu 13:00, maŋŋebárgga, maŋŋel go dát vihtta bellodaga dieđihedje ahte váldet fámu 17 mandáhtain, dieđiha oddasat.se.

Dat mearkkaša ahte Sámedikki stuorámus bellodat, Bivdo- ja guolástansámit (Jakt- och fiskesamerna), gártá opposišuvdnii ovttas Landspartiet svenska samer, Álbmut ja Min Geaidnu bellodagaiguin, dáin leat oktiibuot 14 mandáhta.

 

 

– Viiddis ovttasbargu

Ođđa stivrras leat čieža stivralahtu, ja sii oaivvildit dán leat buorren vuođđun guhkesáigge ja ovddasvástideaddji stivrejupmái.

– Dát viiddis ovttasbargu, man mii dál hábmet, addá midjiide vejolašvuođa ovttasráđiid nannet boazodoalu ja min sámi ealáhusaid, lohká Marita Stinnerbom, guhte lea nubbi dain stivrralahtuin geat gullaba Guovssonástái.

– Min ovttasbargu addá midjiide stuorát deattu go áigut geahpedit boraspirevahágiid boazodoalus, bargat dásseárvvu, giela ja olu eará dehálaš áššiid ovddas, lohká Lars Miguel Utsi, guhte maiddái lea stivrralahttu Guovssonástti ovddas.

– Lea illudahtti go min šiehtadallamiin lea leamaš buorre miellaláhki ja rabasvuohta. Min bellodahkii mearkkaša dat ahte mii, lassin oktasaš áššiide, beassat maid čuvgehit vuovdesámiid áššiid vel eambbo, dadjá Vuodegas bellodatjođiheaddji Jan Rannerud.

 

Doarjja unnimusain

Ođđa stivra lea ásahuvvon guovtti smávvabellodaga vehkiin.

Samiska Folkomröstningspartiet bellodatjođiheaddji, Lars Wilhelm Svonni, lea ilus go bellodat oažžu lunddolaš saji ođđa stivrras.

– Mii illudat dán ovttasbarggus bargat min jienasteddjiid áššiiguin, mas vuođđun lea buohkain galget seamma rievttit, lohká son.

Maiddái Samernas bellodatjođiheaddji Simon Wetterlund lea movttet go sii leat ožžon vejolašvuođa bargat iežaset politihkain dán ovttasbarggus.

– Mii beassat dál searvat bargui oktilis sámepolitihkain mas lea nana vuođđu sámi servodagas, dadjá son.

 

-Almmuhus-