Rievdaduvvon našunálabušeahtas bođii ovdan vástádus movt vuorrasat sáhttet oažžut ruovttoluotta báberhámis bálkádieđuid.
Suoidnemánu 1.beaivvi rájes sáhttet penšunistat oažžut fas «slippen» báhpira, mas leat sin mánnosaš bálkádieđut.
Sii fertejit dieđihit Difii ahte eai hálit digitála poasta oažžut NAV:s. Penšunistasearvi lea guhkit áiggi bargan dáinna áššiin, ja leat dál ožžon dohkkehuvvot sin gáibádusa.
Čilgehus movt dagat
Jus áiggut «slippen» báhpira báberhámis, de ii dárbbat leat Bank ID go várret eret digitála poastta . Sáhtát riŋget 800 30 300 nummárii ja muitalit movt háliidat dieđuid oažžut.
Sáhtát maid fitnat interneahttasiiddus www.norge.no ja válljet «Digital borger» ja «reservasjon» dan siiddus. Dohko čálistat riegádannummára ja personnummára.
De leat várren iežat digitála poasta vuostá. Dalle álggát fas oažžut «slippena» báberhámis poasta mielde.
– Jus it máhte interneahtain, de sáhtát bivdit ránnjá dahje fuolkki veahkehit. Ja lea maid vejolaš riŋgestit, ávžžuha Finnmárkku penšunistasearvi preassadieđáhusas.
