Beaivváš Sámi Našunálateáhter lea gearggus ođđa mánáidbihtáin mas lea vuosttaščájálmas beassášvahkku.
«Pelle Njoammil lea dat njoammil guhte lea simpulan guhkit áiggi Sámis. Go mánát ahkidit, de sii rohttestit Pelle Njoammila luođi ja de son iđista! Muhto eai rávisolbmot jáhke diesa, eai ge báljo masage maid Risten Iŋgá oaidná Sáttomiellis.
Sáttomielli eallin lea girjái. Dál lea fas Pelle Njoammil ihtán Sáttomiellái, juste fal danne go gulai iežas luođi.
Manne son Risten Iŋgá dán háve lea juoiggastan Pelle Njoammila?» čállá Beaivváš Sámi Našunálateáhter bihttá birra preassadieđáhusas.
Ođđa Pelle Njoammil muitalus
Sámi Našunálateáhter Beaivváš lea fas buvttadeame bearaščájálmasa ja dat lea áibbas ođđa muitalus Pelle Njoammila birra.
– Mii illudit čájehit «Pelle Njoammil ja Sáttomielli searat» čájálmasa, mii heive sihke mánáide ja rávisolbmuide, ja man álgočájálmas lea beassážiid, Guovdageainnus, čállá Beaivváš Sámi Našunálateáhter preassadieđáhusas.
Ođđa muitalusa Pelle Njoammila birra lea Karen Anne Buljo čállán, ja son lea ge maid čállán daid ovddit Pelle Njoammil-muitalusaid.
Ovttas Anitta Suikkariin leaba heivehan muitalusa teáhterlávdái.
Álgočájálmas lea Guovdageainnu kulturviesus cuoŋománu 17.b. dii 18.