24 jahkásaš sámi bárdni Peder Niilas Tårnesvik Bergenis vuittii Spellemann 2020 elektronika musihkkasuorggis.
Bearjadaga juhke Spellemann2020 bálkkašumiid NRK1 bokte. Sámi bárdni Peder Niiilas, dahje Niilas mii lea su artistanamma, vuittii elektronika suorggi iežas vuosttaš skearruin «Also This Will Change».
Spellemannprisen čállá ahte 24 jahkásaš Peder Niilas Tårnesvik lea šaddan okta dain eanemus miellagiddevaš produseanttain mat gávdnojit.
– Su bássavuđot musihkas lea melankola jietnavuođđu, dárkilis detáljabargu ja stargadis šáŋŋerhálddašeapmi mainna eai gallis sáhte buohtastahttit iežaset. Son hirpmáhuhtte dávjá iežas innovatiiva ja rikkis jietnagovain, čállet sii Spellemann siiddus.
