Reivvet maid Finnmárkku buohcciviessu lei sádden pasieanttaide, leat leamaš muohttaga vuolde Romssa girdišiljus guovvamánu rájes.
Finnmárkku buohcciviesu gulahallanhoavda Robert Greiner čilge ahte ledje sin sisagohččunreivvet mat gávdnoje billahuvvan muohttaga vuolde Romssa girdišiljus. Boasta lea dál sádden daid ruovttoluotta buohccivissui, ja leat šállošan dán mii lea dáhpáhuvvan.
20 reivve
– Mii leat ožžon odne ruovttoluotta dáid reivviid, oktan šállošemiin. Ledje birrasiid 20 sisagohččunreivve maid Hámmárfeastta buohcciviessu lea sádden pasieanttaide. Midjiide lea čilgejuvvon ahte reivvet leat gahččan olggos go ledje sirdime boastta olggos girdis girdišiljus. Reivvet ledje sáddejuvvon juo guovvamánus, ja gávdnoje dál muohttaga vuolde, muitala Greiner Ávvirii.
Gohččot ođđasit
Buohcciviessu lea addán dál dieđu daidda ossodagaide geat leat sádden gohččumiid olbmuide. Ossodagat galget dál gohččut buohkaid ođđa diimmuide buohccivissui. Greiner lohká iešguđet ossodagaid ieža čuojaheame daidda olbmuide geaidda reivvet galge.
– Ledje gohččumat iešguđet fágasurggiin, sihke medisiinna-, kirurgiija-, mánáid- ja psykiatriijaossodagaid reivvet gávdnoje billahuvvan. In dieđe gal muitalit galge go dihto báikái dat reivvet gal, dadjá son
Gulahallanhoavda ii loga ovttage pasientii leamaš nu hoahppu beassat buohccivissui.
– Dál ii oro goit čájeheame vuos ahte dáidda pasieanttaide lei hoahppu beassat Hámmárfestii.
Ávžžuha buohkaid searvat SMS ortnegii
Greiner ii loga gal leamaš nu ahte buot 20 doavtterdiimmu gohččuma eai leat ollen olbmuide, go sii leat gohččon soapmásiid maiddái SMS bokte.
– Mis ii leat gal lohku juste galles sis leat dieđihan ahte háliidit maiddái SMS dieđuid bokte oažžut dieđu, muhto máŋggas sis leat goit ožžon maiddái dakkár dieđu, dadjá Greiner.
Son ávžžuha ge dál ahte eanet olbmot addit dieđu buohccivissui sii háliidit SMS bokte gohččundieđu, lassin dábálaš reivviide. Mihttu livččii oažžut buohkaid fárrui dán ortnegii, sihkarvuođa dihte.
