– Pål goziha álo ahte bargoustibiin lea buorre dilli ja iežas buriin mielain boktá mojiid, lohká su bargoustit.
Dan čállá Pål Hagerupsena bargoustit, Elisabeth K-S Olsen, gii oaivvilda ahte Pål lea árgabeaisáŋgár ja ánssáša liige juovlafuomášumi.
– Pål bargá Stealli AS:s, ja son lea álo buoremielas, leaikkastallá ja goziha ahte mis, su bargoustibiin, lea buorre dilli barggus, čállá Elisabeth K-S Olsen.
Bargá guovtti sajis
Elisabeth čállá ahte Pål bargá maid borramušgávppis Remas, ja maiddái doppe lea son buoremielalaš:
– Son bargá álo buori barggu go lea barggus. Son dahká bargobeivviid bargoustibiidda buorebun, ja son lea maiddái dakkár gii álo oažžu olbmuid moddját.
– Lea go duohta?!
Pål lea juo geargan barggus Remas go Ávvir deaivvada suinna su ásodagas ja geige juovlaskeaŋkkaža sutnje ja muitala maid su bargoustit, Elisabeth, lea čállán su birra. Sutnje ihtet stuora mojit, iige oro jáhkkime maid gullá:
– Lea go duohta?! Lea go Elisabeth duođas nie olu čábbáid čállán mu birra? Maid, lea ieš čállán ja sádden aviisii?
Go duođaštan ahte lea duohta, de gal ieš maid mieđiha ahte lea olu duohta maid Elisabeth čállá:
– Geahččalan álo leat buoremielas barggus, muhto mun sáhtán gal maid nággestit ja dieđán maid áiggun ja in áiggo, lohká Pål ja lasiheastá ahte gal Elisabeth lea ge ieš maid siivui ja buorredáhtolaš.
– Dehálaš ahte barggus lea buorre dilli
Pål čilge ahte su mielas lea dehálaš ahte buohkain lea buorre dilli barggus, go de loktet buohkat buoremusat barggus.
Son liiko bargat sihke Steallis ja Remas.
– Liikon veaháš eambbo bargat Remas go doppe beasan deaivvadit olu olbmuiguin, lohká Pål.
Muđui lohká ahte servodagas ja olbmuid gaskkas sáhttá leat olu negatiivavuohta.
– De láven mun geahččalit leat buoremielalaš ja siivui, lohká Pål.
22 jagi juo orron
Pål Hagerupsen lea eret Máhkarávjjus, muhto lea 22 jagi juo orron Guovdageainnus ja dáppe háliida boahtteáiggis ain orrut.
– Dáppe bisun, liikon dáppe, deattuha Pål vel mojunjálmmiid.
