-Almmuhus-
OĐĐASATOžžot sámi buohccidivššároahppu prográmmaovddasvástádusa

Ožžot sámi buohccidivššároahppu prográmmaovddasvástádusa

-

-

Jus Finnmárkku fylkkadoavttir galgá searvat ruhtadit sámi buohccidivššároahppu, de ferte maiddái Sámediggi searvat ruđain.

Nu gáibidii Finnmárkku fylkkadoavttir, Eivind Merok, čoahkkimis sierra sámi buohccidivššároahpu boahtteáigásaš organiserema birra, čállá NRK.

Norgga árktalaš universitehta lea gulahallamin Sámedikkiin ruhtadeami birra sámi buohccidivššároahpu plánenbargui.

 

Ožžot prográmmaovddasvástádusa

Referánsajoavku lea čoahkkimis árabus geassemánus, mearridan bidjat sámi buohccidivššároahpu prográmmaovddasvástádusa Sámi allaskuvlii.

Dat mielddisbuktá ahte Sámi allaskuvla sáhttá iešheanalaččat čađahit oahpahusa.

NRK dieđuid mielde oidno čoahkkinbáhpiriiguin ahte dassái go Guovdageidnui leat ásahuvvon resurssat, de lea UiT ja Campus Hammerfeasttas prográmmaovddasvástádus.

 

Sámedikkis eai sáhte vuos lohpidit

Sámedikkeráđđelahttu Henrik Olsen duođašta NRK Sápmái ahte Sámediggi ovdal lea signaliseren doarjut sierra sámi buohccidivššároahpu, muhto ahte dát gáibádus maid fylkkadoavttir lea buktán ii leat vel politihkalaččat meannuduvvon Sámedikkis.

– Mun in sáhte ovdalgihtii lohkat mii boađus šaddá meannudeamis, lohká Olsen.

-Almmuhus-