Sámediggeráđđi lea addán doarjaga Romssa ođđa sámi mánáidgárdeossodahkii.
Sámediggi dieđiha preassadieđáhusas ahte Sámediggeráđđi lea juolludan 200 000 ruvnno Sjømannsbyen mánáidgárdái Romssa ođđa sámi ossodaga ásaheapmái.
– Dát lea duohta illuášši! Romssa suohkan lea viiddidan sámegiel mánáidgárdefálaldaga gávpogis, ja eanet mánát ožžot mánáidgárdefálaldaga mas vuolggasadji lea sámi gielas ja kultuvrras. Go dál lea ásahuvvon ođđa sámi ossodat Sjømannsbyen mánáidgárdái, de nannejuvvo sámi mánáidgárdefálaldat ja fágabiras, dadjá sámediggeráđđi Mikkel Eskil Mikkelsen preassadieđáhusas.
Oidne dárbbu
Sjømannsbyen mánáidgárdi lea Romssa suohkana mánáidgárdi mas leat njeallje ossodaga.
Mánáidgárddis rahppojuvvui 2016:s sierra sámi ossodat, muhto sámi ossodaga rahpama maŋŋá oidne johtilit ahte dárbu lea eanet sámegiel mánáidgárdesajiide.
Go dárbu lei stuoris sámi mánáidgárdesajiide, de mearridii Romssa suohkan ásahit vel ovtta sámi ossodaga mánáidgárdái, ja čavčča rájes leat leamaš guokte sámi ossodaga mánáidgárddis, čuožžu preassadieđáhusas. Sámi ossodagat galget gozihit sámi giela, kultuvrra ja eallinvuogi, ja ossodagain leat sámegielat bargit.
– Hui movttiidahtti oaidnit go golmma jagis sámi mánáidgárdesajit leat lassánan njealji sajis 24 sadjái, dadjá Mikkelsen. Preassadieđáhusas boahtá ovdan ahte Sámediggeráđđi juolluda 200 000 ruvnno prošektii doarjjaortnegis doarjja prošeavttaide ja ovddidanbargui mánáidgárddiin.
