UiT – Norgga árktalaš universitehta áigu divvut ja gárvet ruošša-gielddasámi sátnegirjji ja oažžu dasa 100 000 ruvdnosaš doarjaga.
Gielddasámi oahpaheaddji, girječálli, journalista ja giellaberošteaddji Aleksandra Antonova-rohkki ja ohcci Elisabeth Scheller álggiiga prošeavttain 2011:s. Sátnegirjji galgá álki geavahit ja giela ealáskahttin lea guovddážis. Danne go ii gávdno gielddasámi grammatihkka, de leat sátnegirjjis tabeallat mielddusin mat čilgejit vearba- ja substantiivasojahemiid ja dássemolsašumiid.
– Gielddasámegiella lea duođaid áitojuvvon giella, ja dát ođđa sátnegirji addá geavaheddjiide vejolašvuođa oahppat eanet go dušše sániid, ja lea dehálaš oassi giela ealáskahttimis, dadjá sámediggepresideanta Aili Keskitalo preassadieđáhusas.
