Birasgáhttendirektoráhtta addá lobi Nussir ASA ruvkefitnodahkii álggahit ruvkedoaimmaid ja luoitit ruvkebázahusaid Riehpponvutnii, Fálesnuoris.
Birasgáhttendirektoráhtta addá lobi Nussir ASA ruvkefitnodahkii álggahit ruvkedoaimmaid ja luoitit ruvkebázahusaid Riehpponvutnii, Fálesnuoris.
Birasdirektoráhtta lea viidát árvvoštallan nuoskkidanlága mielde Nussir ASA ruvkedoaimmaid ohcamuša ja ruvkebázahusaid luoitima Riehpponvutnii.
– Ollislaš árvvoštallamiid mielde birrasa vuhtii váldimis ja servvodatávkkálaš beliid, de leat mearridan addit lobi ruvkedoaimmaid álggahuvvot Nussiris ja Ulveryggenis. Mii oaivvildit birrasa dáfus lea dohkálaš addit ruvkedoaibmalobi go leat bidjan dan mađe garra gáibádusaid, lohká Birasdirektoráhta direktevra Ellen Hambro.
Dohkkehit nuoskkideami
Buot nuoskkideapmi lea lobiheapme nuoskkidanlága mielde. Birasdirektoráhtta lea árvvoštallan makkár nuoskkideamit galget dohkkehuvvot. Deháleamos negatiiva birasváikkuheapmi lea 8 njealjádaskilomehtera, dahje 10-15 proseantta Riehpponvuonas, váldojuvvo mearradeponiijai. Buot bodnefauna deponiijasajis jávká go luitojuvvojit ruvkebázahusat mearabodnái. Sihke deponiijasadji, vihtta njealjádaskilomehtera ja 2,5 njealjádaskilomehtera ravdaavádat, leat regulerejuvvon deponiijaatnui regulerenplánas mii lea dohkkehuvvon Suohkan- ja ođasmáhttindepartemeanttas.
Sámi beroštumit
Ruvkedoaibma sáhttá váikkuhit sámi beroštumiid, nu movt boazodoalu. Negatiiva váikkuhusat leat Birasdirektoráhta árvvoštallamiid mielde čadnon areálahálddašeapmái.
– Birasdirektoráhtta lea diibmá, go regulerenplána dohkkehuvvui, dahkan ollislaš mearrádusa ja vihkkedan boazodoalu dárbbu areálaide guovllus, lohká Ellen Hambro.
Direktoráhtas leat leamaš golbma ráđđádallančoahkkima Sámedikkiin, ja okta čoahkkin guoskevaš boazoorohagain. Ráđđádallamat Sámedikkiin boatkanedje go eai nákcen ovttaoaivilvuhtii boahtit ruvkedoaimmaid birra Fálesnuori suohkanis.
Fágalaš vuođu mielde
Nussir ASA direktevra Øystein Rushfeldt lohká dat lea dehálaš mearrádus sihke Nussir ASA:i, Fálesnuori suohkanii ja Norgga bákteealáhussii.
– Mii leat ilus go direktoráhtta lea dahkan positiiva mearrádusa nanu fágalaš vuođu mielde, ja mii illudit ovttas Fálesnuori báikegottiin, geat ollu jagiid leat bargan ovttas Nussiriin ollašuhttit prošeavtta. Min mihttu lea ásahit gánnáhahtti ja guhkitáigái čiehkajuolgefitnodaga Fálesnuoris, mas lea fokus atnit buoremus birasčovdosiid mat leat almmus ja čájehit čielga servvodatovddasvástádusa, lohká Rushfeldt.
