Vaikko Beaivváš Sámi Našunálateáhter rihkku dásseárvolága, de besset čájehit «Gába» bihtá nuvttá dievdoolbmuide.
Vaikko Beaivváš Sámi Našunálateáhter rihkku dásseárvolága, de besset čájehit «Gába» bihtá nuvttá dievdoolbmuide.
Mannan vahkus dieđihii Beaivváš Sámi Našunálateáhter ahte áigot fállat nuvttá bilelahtaid dievdduide iežaset «Gába» čájálmassii, mainna galget johtit sámi báikkiin dán mánus.
Vealaheapmi
Dásseárvo- ja vealahanáittardeaddji lohká NRK Sámi bokte, ahte Beaivváš Sámi Našunálateáhter árvvoštallá eará vugiid movt geasuhit dievdduid teáhterčájálmasaide go nuvttá bileahtaid fállat dievdoolbmuide Gába teáhterčájálmassii.
– Dásseárvoláhka gal čielgasit gieldá vealaheami nissonolbmuid ja dievdoolbmuid gaskkas, ovdamearkka dihte jus earuha hattiid sohkabeliid gaskkas. Nu dadjá Dásseárvo- ja vealahanáittardeaddji nubbijođiheaddji, Elisabeth Lier Haugseth NRK Sápmái.
Beare maŋŋit rievdadit
Beaivváža hoavda Rolf Degerlund ii lohkan iežas diehtit ahte lágat leat nu Norggas, ja sin áigumuš ii lean vealahit ovttage sohkabeali.
– Go leimmet juo almmuhan ahte dievddut besset nuvttá «Gába» bihttái, de lei beare maŋŋit praktihkalaččat rievdadišgoahtit dan. Mii leat ožžon lobi čájehit dán vihtta čájálmasa maid leat plánen, muhto fertet boahtteáiggis rievdadit movt geasuhit dievdduid maid teáhterii, lohká Degerlund.
Guovttis ovttain bileahtain
Degerlund lohká Ruoŧas, gos ieš lea eret, ahte doppe lea dábálaš lágidit nu movt ovdamearkka dihte «nissoniid eahkeda» teáhteris.
– Norggas sáhttá ovdamearkka dihte fállat ovttain bileahtain besset guovttis vuolgit teáhterii, ja nu ii vealat ovttage. Dat lea vuohki maid áigut árvvoštallat go geahččalit geasuhit dievdoolbmuid teáhterii boahtteáiggis.
Odne disdaga čájehit Beaivváš Sámi Našunála Teáhter «Gába» bihtá Deanus.
– Leaš dál oaidnit bohtet go eanet dievddut go lávejit dábálaččat, lohká Degerlund.
