Norgga guolásteaddjit eai leat goassege ovdal vásihan dákkár hattiid gonagasreappáin. Ovtta reabbás ožžot dál sullii duhát ruvnno.
– Šaddá erenoamáš buorre jahki juohke ládje, dadjá guolásteaddji Hans Petter Rasmussen iTromsø aviisii. Son muitala ahte ii leat goassege ožžon nu buori hatti guolis go dál.
Guolásteaddjit leat vuovdán guoli 14 miljárdda norgga ruvnno ovddas dán rádjái, dán jagi. Dat lea eambbo go olles mannan jagi, ja njeallje miljárdda eambbo go diibmá seamma áigodaga.
Soađi ja korona geažil lea leamaš váttis oažžut vuođđobuktagiid, ja nu lea lassánan guollehaddi hirbmadit. Dorskehaddi lea loktanan 50 proseanttain, 24 ruvnnos 36 ruvdnui. Dorski lea stuorámus dienasgáldu eanas guolásteddjiide Norggas, muhto maiddái gonagasreappás lea buorre dienas dál.
Dábálaš gonagasreabbá deaddá birrasiid 2,2 kilo. Kilohaddi lea leamaš 480 ruvnno, muhto haddi lea loktanan guvttiin čuđiin ruvnnuin, dahje 70 proseanttain diimmážis dán jahkái. Rámbuvrrain máksá gonagasreabbá dál 1.000 ruvnno kilos.
(©NTB)
