-Almmuhus-
OĐĐASATOžžot báhčinlobi

Ožžot báhčinlobi

-

-

Guovdageainnu ovdagoddi ii čuovvolan hálddahusa árvalusa.

Golbma eananeaiggáda Guovdageainnus leat ohcan lobi báhčit čuotnjágiid mat sin oaivila mielde vahágahttet sin gittiid dál giđđat. 

Sii leat ohcan lobi báhčit dábálaš čuotnjága, «grågås dárogillii», dahje Canada-čuotnjága. 

 

Ožžot lobi

Dál lea Guovdageainnu ovdagoddi meannudan ášši ja attii dan golbmasii lobi báhčit čuotnjágiid mat vahágahttet sin gittiid. 

– Ovdagoddi lea bidjan vissis eavttuid čielggadan dihtii makkár lottiid ja makkár áigodagas ja makkár ráddjojuvvon guvlui lea addojuvvon báhčinlohpi. Leat muđui lágaid ja njuolggadusaid maid juohke okta bivdi šaddá čuovvut. Earret eará čuonjášlájaid ektui maid. Nu ahte eai rihkko lága, ahte eai báže daid maid ii leat lohpi báhčit, čilge Guovdageainnu sátnejođiheaddji Johan Vasara.

– Dan mii gal dieđusge eaktudat ahte dát golmmas dovdet ráfáidahtton čuonjášlájaid. 

 

– Nu ahte ehpet bala ahte báhčet ráfáidahtton lottiid? 

– Na dan gal eat daga. 

 

– Vaháguhttet

Vasara lohká iežaset diehtit ahte čuotnjágat Norggas dahket vahágiid boanddaid gittiide, erenoamážit dál arra giđa.

– Nu ahte dat ii leat nu imaš ahte dáhpáhuvvá Guovdageainnus maid. 

Hálddahus lei evttohan hilgut ohcamušaid, ja Vasara čilge ná go jerro manne ovdagoddi mearridii earáládje:

– Lea dieđusge politihkkáriid vuorbi, váldit árvvoštallama eará ládje buorrin servodahkii ja ealáhusaide. Dán oktavuođas bijaimet boanddaid beroštumi ovddemužžii.

-Almmuhus-