-Almmuhus-
OĐĐASATOžžon virggálaš sámegiel nama

Ožžon virggálaš sámegiel nama

-

-

Norgga árktalaš studeanttaidovttastus lea gásttašuvvon sámegillii. Dan almmuhii direktevra Sámi álbmotbeaivvi. 

Sámi álbmotbeaivvi deaivvadii Norgga árktalaš studeanttaidovttastusa direktevra Hans Petter Kvaal sámediggepresideantain Aili Keskitaloin. 

– Gea, dá lea min virggálaš sámegiel namma. Min mielas lea hui heivvolaš dán almmuhit Sámi álbmotbeaivvi, ja lei gal áigi ahte bijaimet iežamet doibmii sámegiel nama. Norggas han leat guokte virggálaš giela ja mii gullat guvlui gos stuora oassi álbmogis leat sámit, dajai Kvaal ja čájehii pláhkata masa lei čálihan nama. 

 

Šiltejit sámegillii 

Sámediggepresideanta mielas lea positiiva ođas go Norgga árktalaš studeanttaidovttastus dáhttu bidjat maiddái sámegiel nama iežaset dovdomerkii ja šilttaide. 

Norgga árktalaš studeanttaidovttastus direktevra dadjá dan dehálažžan alcceseaset. 

– Searvadahttin lea studeanttaidovttastusa deháleamos jođihanfápmu, danin lea midjiide áibbas lunddolaš fátmmastit sámegiela iežamet gulahallamii, lohká Kvaal. 

 

Illudit 

Sámi studeantasearvi Davvi-Norggas (SSDN) illudit go studeanttaidovttastus lea ožžon sámegiel nama. 

– Lea hirbmat dehálaš ahte Norgga árkalaš studeanttaidovttastus lea ožžon sámegiel nama go mii han leat sámi guovllus ja oassi universitehta studeanttain leat sápmelaččat. Sámegiella boahtá dál vel eanet oidnosii ja dat lea min mielas dehálaš go dat dovddusindahká ahte sámi kultuvra ja giella eallá ja geavahuvvo, dadje SSDN stivrajođiheaddji Leif Henrik Halvari studeanttaidovttastusa neahttasiidduide

-Almmuhus-