Álttá nuoraidskuvla lea ožžon váhnemiin ovtta váidaga sámegieloahpahusas, ja rektor oaivvilda lea buorre go fylkkamánni lea bidjan johtui bearráigeahču vai besset čielggadit boasttuvuođaid.
Álttá nuoraidskuvla lea ožžon váhnemiin ovtta váidaga sámegieloahpahusas, ja rektor oaivvilda lea buorre go fylkkamánni lea bidjan johtui bearráigeahču vai besset čielggadit boasttuvuođaid.
Mannan vahkus bođii ovdan ahte Finnmárkku Fylkkamánni lea bidjan johtui bearráigeahču sámegieloahpahusas Álttá suohkanis ja Álttá nuoraidskuvllas. Ulbmil dainna lea gávnnahit movt skuvla bargá ohppiiguin geain lea vuoigatvuohta oažžut sámegieloahpahusa.
Okta váidán oahpahusa
Álttá nuoraidskuvlla rektor Magne Medlie muitala sii leat ožžon ovtta váidaga váhnemiin geat eai leat duđavaččat skuvlla sámegieloahpahusain, muhto ii áiggo muitalit sisdoalu das.
– In áiggo árvvoštallagoahtit lea go dat váidda vuolggahan fylkkamánni bearráigeahču, go lea oalle dábálaš ahte fylkkamánni čađaha bearráigeahču skuvllain, lohká son.
Ii dramatihkka
Rektor Medlie muitala sis leat skuvllas badjelaš 40 oahppi geain lea sámegieloahpahus, ja leat sihke vuosttaš-, nubbi- ja amasgiellan.
– Mis leat vuogádagat movt bargat sámegieloahpahusain, ja ohppiiguin geain lea vuoigatvuohta sámegieloahpahussii. Fylkkamánni bealis eai boađe ieža fitnat skuvllas, muhto leat dáhtton min skuvlla sáddet dokumeanttaid ja dieđuid mat duođaštit movt mii bargat. Mun in oainne das maidege dramatihkaid, ja máŋgii lea dákkár bearráigeahčču baicca positiiva go dat čielggada leat go mis boasttuvuođat. Mii háliidit ahte oahpahusas galgá buot leat ortnegis ja jus leat boasttuvuođat, de beassat mii njulget daid, lohká son.
Váttis gávdnat oahpaheddjiid
Álttá suohkana skuvlafágalaš ovddasvástideaddji Tove K. Knudsen muitala sii galget čoahkkanit nuoraidskuvlla rektoriin ja Álttá sámegieloahpaheddjiid fierpmádaga jođiheddjiin dán vahkus ja bargagoahtit áššiin. Son lohká okta stuorámus hástalusain sámegieloahpahusas lea gávdnat gelbbolaš oahpaheddjiid.
– Dat lea juoga masa mii fertet geahčadit doaimmaid bidjat, earret eará iskat rekrutterenplánaid. Maiddái lea váttis gávdnat sadjásaš oahpaheddjiid sámegielas, ja nu movt mun lean ipmirdan, de ii leat dušše mis dat váttisvuohta, muhto maiddái sámi váldoguovlluin, nu go Kárášjogas ja Guovdageainnus, lohká son.
Rámida váhnemiid
Álttá sámi searvvi jođiheaddji Inger Elin Utsi lohká lea buorre go váhnemat váidet jus lea dovdu ahte sin mánát eai oaččo dan oahpahusa man galget lága mielde.
– In dieđe mii lea váidaga duogáš, muhto bearráigeahčču manná čađa buot ja čuvge skuvlla dilálašvuođa. Jáhkkimis buorida dat váilevašvuođaid, leažžá dál kvalitehta, oahpaheaddjedilli dahje oahpponeavvodilli, lohká son.
