– Doarjja šaddá čoavddan munno teknologiija ráhkadit vuovdingálvun, muitaleaba Aleksander Løkken ja Kevin Xavier Usersights AS fitnodagas, mii lea okta guovtti UiT studeantafitnodagain maidda Innovašuvdna Norga lea juolludan miljovnna kruvnna Innovašuvdna Norgga STUD-ENT-ortnegis.
Mannan vahkus juolludii Innovašuvdna Norga oktiibuot 22 miljovnna kruvnna 22 studeantafitnodahkii miehtá Norgga. Daid searvvis leat guokte fitnodaga mat leat vuolgán UiT:s, namalassii Usersights AS ja Leikanger Innovations AS. Usersights AS fitnodaga duohken leaba Aleksander Løkken ja Kevin Xavier, guktot UiT Gávpeallaskuvlla masterstudeanttat. Soai atniba hui alla árvvus go leaba ožžon doarjaga STUD-ENT ortnegis.
– Dát doarjja lea čoavdda ráhkadit munno teknologiija gávpegálvun, erenoamážit go dat addá munnuide vejolašvuođa lasihit bargojoavkku eanet gelbbolašvuođain. Innovašuvdna Norgga doarjja dahká ahte Big Data šaddá smávva ja gaskamearálaš stuorra fitnodagaide olahanmuttus miehtá máilmmi, deattuheaba Løkken guovttos Xavierain preassadieđáhusas.
Usersights AS ráhkada prográmmagálvvu mii analysere stuorra iehtohivvodagaid ja galggašii addit buoret geahčastaga man bures sin gálvu lihkostuvvá máilmmi márkanis ja manin dat dahká dan.
