Ealgabivdu vuorbádeapmi lea bivdojovkui dego juovlaruohtta, ođđabeairuohtta ja beassášlávvordat oktanaga, ja sii besset ge čakčat vuolgit bivdui gosa ledje háliidan.
Ealgabivdu vuorbádeapmi lea bivdojovkui dego juovlaruohtta, ođđabeairuohtta ja beassášlávvordat oktanaga, ja sii besset ge čakčat vuolgit bivdui gosa ledje háliidan.
Otne mearriduvvui geat Finnmárkkus besset ealgabivdui boahtte čavčča. Guovdageidnui ledje Villmarksenter guossohanbáikái čoahkkanan dievva ealgabivdit gullat oažžu go sin bivdojoavku bivdoguovllu.
Per Otto Pulk oaččui bivdoguovllu Siebii, ja lei hirbmat duhtavaš dainna.
– Min bivdojoavkkus leimmet buohkat válljen Siebe vuosttážin ja go mun dál ožžon dan, de mearkkaša mis šaddá bivdu čakčat gosa leimmet sávván. Ieš dát vuorbádeapmi lea midjiide ealgabivdiide dego juovlaruohtta, ođđabeairuohtta ja beassášlávvordat oktanaga, ja sáhttá lohkat mii oaččuimet dan skeaŋkka maid leimmet sávvan,lohká Pulk.
–Varra ruohtestii
Go Pulk namma čurvejuvvui de njuikii son bajás ja ceggii gieđaid áibmui.
– Mun lean ovddeš spábbačiekči nu ahte ruohtestii varra ja adrenaliidna gal loktanii oalle bajás, nu ahte dat mearkkaša munnje ja sihkkarit maid mu bivdojovkui hui ollu.
Pulk lea bivdán ealggaid dan rájes lei 18-jahkásaš, ja lea ge bivdán 20 jagi. Pulk muitala soai leaba vilbeliin Per Johnny Sarain álgán fárrolaga ohcat ealgabivdoguovllu 2010 rájes, ja dál lea nubbi jahki go bivdojoavku beassá vuosttaš vuoruhuvvon guovllus bivdit.
– Mii eat ožžon bivdoguovllu jagiid 2012 ja 2013, ja diibmá oaččuimet vuosttaš vuoruhuvvon saji ja dál fas, nu ahte mis lei lihkku,lohká Pulk.
Ollu guovllut
Guovdageainnu ealgabivdoguovlluid vuorbádeami almmuhandoaluid lágideaddji, Guovdageainnu ealgabivdisearvvi jođiheaddji Per Nils Saari, muitala lea nu ahte álggos gesset nástebivdoguovlluid.
–Nástebivdoguovllut leat várrejuvvon suohkana olbmuide, ja dat leat 60 proseanta Guovdageainnu bivdoguovlluin. Daid eará bivdoguovlluid vuorbádeamis leat olggobeale olbmot maid mielde. Guovdageainnus leat 47 bivdoguovllu ja juohke bivdoguovllus besset báhčit guokte ealgga, earet davvi bivdoguovlluin gos lea okta ealli earis, čilge Saari gii ieš maid oaččui nástebivdoguovllu.
Finnmárkkus lea Finnmárkkuopmodat (fefo) mii hálddaša ealgabivddu ja vuorbáda ealgabivdoguovlluid. Dán jagi ledje 375 bivdojoavkku mat gilvaledje olles Finnmárkkus 295 bivdoguovllu alde. Bivdoguovlluid obbalaš earri 1.066 ealli.
Dás oainnát gii bivdá gos 2015 čavčča: (Listtut almmuhuvvojit diibmu 22.00 gaskavahkku)
Geahča videobihttáža Guovdageainnu doaluin:
