Leanastivra Jämtlánddas leat mearridan addit gumpebáhčinlobi Ruvhten Sijtii.
Lei mannan vahku go oidne gumppe čearu birrajagi eatnamis. Muhtin bivdit leat maid gávdnan goddon bohcco mannan vahkkoloahpa, muitala Ruvhten Sijte sátnedoalli Markus Haaneas Rensberg.
– Leat sáddejuvvon goddon bohcco iskosat vai mii oažžut fargga duođaštusa lea go gumpe goddán dan. De mii vel oažžut gumppe DNA-dárkkisteami iskosis.
Váttis bivdit bievlan
Markus Haaneas Rensberg muitala maid ahte Jämtlándda Leanastivra lea mearridan addit gumpebáhčinlobi, lohpi bistá dušše čieža beaivvi ja ahte dál lea váttis bivdit sin guovllus.
– Mis lea bievla dáppe eat ge vuohte gumppe dál. Nu ahte mii fertet báhčinlohpái ohcat guhkideami.
Ollu čearuin vuohttán
Rensberg muitala ahte olu čearut sin lahkosis leat oaidnán dehe vuohttán gumppe, nu go Orredahkki, Tåssåsen, Handölsdalen ja Mittådalen. Markus Haaneas Rensberg muitala ahte dál sii vurdet muohttaga vai sáhttet bivdigoahtit gumppe ja de joatkit čavčča čohkkemiin ja rátkkašemiin.
