-Almmuhus-
-Almmuhus-
KULTUVRA Ožžo kultur- ja valáštallan­stipeanddaid  

Ožžo kultur- ja valáštallan­stipeanddaid  

-

-

Sámediggeráđđi lea juolludan ovtta kulturstipeandda ja golbma valáštallanstipeandda 2019:s.

Kulturstipeanda addojuvvo dánsadáiddárii Ánna-Katri Helanderii, ja valástallanstipeanddaid ožžot báhčinčuoigi Amalie Kristine Triumf, turnejeaddji Peder Funderud Skogvang ja jiekŋahockeyvaláštalli Tuva Sirin Schall Mikkelsen.

Sámedikki kultur- ja valáštallanstipeanda galgá movttiidahttit sámi nuoraid bargat dáidagiin, kultuvrrain ja valáštallamiin. Njeallje stipeandda leat juhkkojuvvon, 25 000 ruvnno guhtiige.

—  Dán jagi ohce ollugat stipeanddaid, erenoamážit valáštallanluohkás. Mii leat válljen juolludit stipeandda njealljásii geat ovddastit daid sámi nuoraid govdodaga geat barget dáidagiin ja valáštallamiin, ja geain buohkain leat buorit bohtosat ja áigumušat šaddat vel ain buorebun iežaset suorggis. Mii sávvat sidjiide lihku ja doaivut ahte stipeanda movttiidahtášii sin áŋgiruššat viidáseappot, dadjá sámediggeráđđi Henrik Olsen preassadieđáhusastis.

Buohkat devde eavttuid

Bohte 11 ohcama, ja buohkat devde eavttuid. Ovccis ohce valáštallanstipeandda ja guovttis kulturstipeandda.

Dá lea ákkasteamit  juolludemiide:

Kulturstipeanda:

Ánna-Katri Helander, Guovdageaidnu, lea hui čeahpes dánsejeaddji, gii seaguha dánsumis iežas kultuvrra elemeanttaid dálááiggi dáiddavugiiguin. Su stiila ja álbmosii buktin lea rievdan jagiid mielde, son lea dáidagis bokte čájehan ahte lea erenoamáš čeahpes dáiddár. Hiphop bokte lea son maid vánddardan servodatdigaštallamis. Ánna Katri lea leamaš jagi nuorra dáiddár Riddu Riđđu Festiválas 2017:s, ja geassemánus 2018 álggahii son su hutkás eallima Lásságámmis.

Valáštallanstipeanda:

Amalie Kristine Triumf, Ráisa, váldá hui duođas valáštallama mii lea máilmmis gehččiide bivnnuheamos valáštallan: čuoiganbáhčin. Son valáštallá ámmátdásis, ja lea ollu háviid ovddastan Sámi Arctic Winter Games gilvvuin. Sus lea áigumuššan olahit valáštallamiin guhkás máilmmis, ja son háliida leat buorre ovdagovva sámi nuoraide.

Peder Funderud Skogvang, Romsa, lea ollu jagiid lihkostuvvan turn-valáštallamis njunušdásis Norggas, ja lea dál Norgga riikkasearvvi juniorsearvvis. Son oaččui silbba Norgescup 2:s 2018:s ja geassemánus 2019 bođii son čihččet sadjái senior-NM:s. Son lea buorre ovdagovva sámi nuoraide, ja son lea valáštalli geas vissásit lea čielga sámi identitehta.

Tuva Sirin Schall Mikkelsen, Oslo, lea ollu jagiid leamaš jiekŋahockeys alla dásis, ja lea ožžon máŋga bronsamedálja ja moadde silbamedálja. Son lea valáštalli gii lea olahan namahusa ironwoman jiekŋahockey elihtaráiddus. Son lea čájehan ahte maiddái sámi nuorat sáhttet birget bures njunnošis dakkár valáštallamiin mat eai leat nu dábálaččat Sámis.

Ovddeš vuoitit

2008: Finn Hågen Krogh Odd Isak Kappfjell  2011: Valáštallanstipeanda: Christer Kjønsø Karlsen, Silje Wilsgård ja Marie Sofie H. Hætta Kulturstipeanda: Marja Helena Fjellheim Mortensson 2014: Valáštallanstipeanda: Ole Mathis Sara Nedrejord ja Aslak Ole Eira Kulturstipeanda: Ina-Theres Andrea Sparrok, Sarakka Gaup ja Anne Maia Raanes Sørensen 2016: Valáštallanstipeanda: Rakel Birkeli ja Jan Arthur Reinås Kulturstipeanda: Anna Linea Fjellheim Varsi ja Ella Marie Hætta Isaksen 2018: Valáštallanstipeanda: Benedicte Guttorm ja Sajane Karina Olsen Kulturstipeanda: Anna Kaisa Partapuoli ja Johan Daniel Turi

- Advertisement -
-Almmuhus-