Dat guokte dievddu geat leaba áššáiduhtton muhtin 40-jahkásaš islándalaš dievddu goddima ovddas Donjevuonas, galgaba biddjot rájusgiddagassii mánnodateahkeda.
Dat guovttis geat leaba 35- ja 32-jahkásaččat, galgaba giddagasčoahkkimii mánnodateahkeda Nuorta-Finnmárkku diggegottis diibmu 19 ja 19.30 mánnodateahkeda. Ávvir lea geahččalan oažžut oktavuođa áššáskuhtton dievddu advokáhtaide, muhto ii leat heiven kommenteret vuos ášši.
Lagamuččat ožžon dieđu
Lei 40-jahkásaš Gisli Thor Thorarinsson gii jámii. Politiijat dieđihit mánnodaga ahte goddon dievddu lagamuččat leat ožžon dieđu dáhpáhusa birra ja ahte dan dihte leat dál almmuhan su nama.
– Leat máŋga vihtana gažadan, muhto leat ain eanet vihtanat báhcán. Sáhttá maid leat šaddat áigeguovdil jearahallat olbmuid geat ásset Islánddas, lohká Indbjør preassadieđáhusas maid politiijat leat sádden.
Vuordime dulkka
35-jahkásaš lea áššáiduhtton goddima ovddas ja 32-jahkásaš ges go lea searvan daguide.
– Giddagasčoahkkin dollo odne eahket dan sivas go mii leat vuordime islánddadulkka deike. Dulka lea ádjánan dan sivas go pilohtain lea bargoheaitta, dieđiha Finnmárkku politiijaguovllu gulahallanráđđeaddi Silja Arvola NTB:i.
Son lohká ahte dat guokte islándalačča eaba leat gažaduvvon politiijaide, muhto leat pláneme gažadeami gaskavahkku.
Vieljažagat
35-jahkásaš, gean navdet čađahan goddima, gáibiduvvo rájusgiddagassii njealji vahkui reivvestallan- ja guossástallangildosiin.
Nubbái gáibiduvvo vahkku rájusgiddagassii reivvestallan- ja guossástallangildosiin. Islándda mediat čállet ahte 40-jahkásaš gottáhallan dievdu ja 35-jahkásaš gii lea áššáiduhtton, leaba vieljažagat.
Nubbe dievdu, 32-jahkásaš, gii lea áššáiduhtton searvan daguide, lea čilgen politiijaide vehá dáhpáhusa birra, ii ge mieđit iežas ráŋggáštussivalažžan áššáiduhttimii.
Dáhpáhus lávvordatiđit
Politiijat ožžo lávvordaga čuovganeapmái dieđu ahte muhtin dievdu lei báhččon Donjevuonas sullii diibmu 05.30.
40-jahkásaš dievdu gávdnui bahut roasmmohuvvan muhtin viesus Donjevuonas. Heahteveahkit geahččaledje gádjut dievddu, muhto eai nagodan gádjut su heakka ja son jámii.
(©NTB)
