Ožžo dieđu sisagaikuma birra

Álttás ožžo politiijat dieđu ahte muhtun lei gaikume sisa ovtta vissui. Čájehuvvui ahte lei viessoeaiggát gii lei vajálduhtten čoavdaga. Dan čállá Finnmárkku politiijaguovlu Twitteris.

– Son beasai ieš sisa, čállet sii.

Varraiskosii

Hammerfeasttas váldui muhtun nuorra nieida varraiskosii, go politiijat balahit su vuodján juhkanvuođas.

Álttás fas válde vuodjinkoartta muhtun mopedavuoddjis. Son vujii duššo maŋŋejuvlla alde, politiijaid ovddabeale. Politiijat válde mopeda vai besset teknihkalaččat iskat sihkkela.

Álttás beaškkehedje guokte biilla oktii, ja nubbi biila čierastii eret luottas. Politiijat manne báikái. Ii okta ge lean roasmmehuvván, ii ge lean promilla biilavuddjiin.

Feastariedja

Álttá politiijat ožžo dieđu feastarieja birra Sagas. Sii manne báikái, ja gohččo viessoeaiggáda vuolidit musihka.

– Son áiggui doahttalit, čállet politiijat Twitterii.

Maiddái Hessengas, Mátta-Várjjagis lei feastariedja, man birra politiijat ožžo dieđu. Sii vuoddjájedje báikái.

Dasto álge máŋggas feastas doarrut.

– Mis lea kontrolla. Ii okta ge galgga roasmmehuvvan, čállet Twitterii.

Vajálduhttán orrunbáikki

Politiijain leat feara makkár doaimmat. Girkonjárggas sii šadde veahkehastit muhtun drošševuoddji.

– Mii veahkehit ovtta drošše, olmmoš gii lea droššes ii muitte gos son orru, čállet politiijat.

Gožžan almmolaš báikkis

Goahtečorus, Sállanis váldui muhtun dievdu gožžamis almmolaš báikkis.

Seamma báikkis galgá muhtun 20-ahkásaš dievdu časkán nuppi. Dasto lea guođđán báikki.

– Mii čuovvolit ášši, čállet Twitteris.

Časkán vuolalásiin

Ovddit ija galgá muhtun ožžon vuolaláse ámadadjui Hammerfeasttas.

Mannan ija galgá seammalágán dáhpáhus leamaš Hammerfeasttas. Muhtun 20-ahkásaš dievdu dolvojuvvui doavttiriskosii, go lei šaddan hávvi.

Politiijat eai dieđe gii vearredahkki lea, muhto čuovvolit ášši.

Badjelmeare juhkan

Čáhcesullos šadde politiijat bidjat muhtun nuorra dievddu arrestii go galgá suhttan ládje láhtten earáid vuostá.

Hammerfeasttas fas šadde bidjat muhtun 40-ahkásaš nissonolbmo eret gávpotguovddážis, go lei badjelmeare gárremiin. Muhtun nuorra nieidda šadde fas politiijat doalvut doavttiriskosii go lei badjelmeare gárremiin.