-Almmuhus-
OĐĐASATOvttasbargočoahkkin maŋiduvvo

Ovttasbargočoahkkin maŋiduvvo

-

-

Sámeparlamentarihkkáriid konferánsa 2020 maŋiduvvo korona njoammudávdda geažil.

Konferánsa galggai lágiduvvot Anáris borgemánu 13.—14. beivviid 2020. Sámi parlamentáralaš ráđi (SPR) stivra čoahkkanii gáiddusoktavuođaid bokte geassemánu 6. beaivvi ja mearridii čoahkkimisttis, ahte konferánsa sirdojuvvo koronaviruspandemiija dihte. Konferánssa ođđa lágidanáiggis áigot mearridit maŋŋelis geasi áigge, dan dieđiha Suoma Sámediggi preassadieđáhusas.

– Dađi bahábut eat oainne áššis eará molssaeavttu ráđđejeaddji pandemiija dihte. Konferánsa lágiduvvo goittotge dalán, go dilli dan suovvá. Riikkarájiid rasttideaddji sámepolitihkalaš ovttasbarggu dáfus lea dehálaš, ahte sámeparlamentarihkkárat čoahkkanit, ja ahte sis lea vejolašvuohta beassat ságastallat oktasaš áššiin ja hástalusain, dadjá SPR sátnejođiheaddji Tuomas Aslak Juuso konferánssa sidimis

Juohke goalmmát jagi 

Sámeparlamentarihkkáriid konferánsa lágiduvvo juohke goalmmát jagi. Sámi parlamentáralaš ráđđi vástida sámeparlamentarihkkáriid konferánssa praktihka lágideamis, ja jagi 2020 konferánssa praktihka lágidanovddasvástádus gullá Suoma sámediggái. Konferánssas, mii lágiduvvo Anáris, leat juo golbma váldotemá: dálkkádatrievdan, maŋemuš áiggiid sámiid vuoigatvuođaid ovdáneapmi ja sámedikkiid oktasaš válgabeaivi.

Sámenuoraid konferánsa

Maiddái sámenuoraid konferánssa galge lágidit borgemánus parlamentarihkkáriid konferánssa olis. Oktasaš davviriikkalaš nuoraid konferánsa lágiduvvo guovtti jagi gaskkaid ja boahttevaš temán lea mearriduvvon dálkkádatrievdan.

– Dađi bahábut dán dilis eai leat eará molssaeavttut. Eat sáhte goittotge diktit dili heajudit sámenuoraid váikkuhanvejolašvuođaid rájiid rastá, nappo SPR nuoraidráđđi čielggada dál vejolašvuođaid lágidit sámenuoraid konferánssa dahje oasi das gáiddusin, gávnnaha nuoraidráđi sátnejođiheaddji Anni-Sofia Niittyvuopio.

-Almmuhus-