-Almmuhus-
-Almmuhus-
SMÁVVAOĐĐASATOvttas­bargan Sáme­dikkiin, Sámi­ráđiin ja Árvvuin

Ovttas­bargan Sáme­dikkiin, Sámi­ráđiin ja Árvvuin

-

-

Ođđa namma ­Joikakaker-biepmus lea VILTi. Sámi kultuvra lea duogážin sihke ođđa nammii ja hápmái.

Nortura, mii lea ráhkadan ođđa biebmoolggoža ja nama, lea gulahallan sihke Sámedikkiin ja Sámiráđiin ovdánahttinbarggu oktavuođas. Norturas lea maid leamaš ovttasbargu Sámi hábmenfitnodagain Árvvuin.

Árvu fitnodat lea leamaš stuora oassin ođđa doavnnji hábmemis. Árvu lea doaibman ráđđeaddin nammaválljemii, designelemeanttaid váljemii ja movt ivnniid geavahit ođđa doavnnjis.

– Mii leat ilus go leat beassan veahkehit Nortura hábmenproseassas, ja mii leat rápmásat go leat nagodan sámevuođa oažžut mielde dakkár buvttadeapmái. Bargoproseassa oktavuođas mis lea buorre gulahallan leamaš ivdnegeavaheami ja giellageavaheami birra, ja movt sáhttá sámi elemeanttaid geavahit nu ahte ii šatta stereotyhpa hápmi. Mii leat maid hui ilus go min jurdda ahte geavahit sámegiela olggožis vuhtii váldui, ja ahte olggoža elemeanttat muitalit eambbo bohcco birra, dadjá Árvu fitnodaga Marie Louise Somby preassadieđáhusas.

– Min ulbmil Nortura ja Sámiráđi ovttasbargguin lea ahte ođđa biebmoolggoš galgá geasuhit sihke sápmelaččaid ja dáččaid, dadjá Somby.

Sávvá movttiidahttit earáid

Maiddái Sámiráđi kulturossodaga jođiheaddji lea giitevaš go Sámiráđđi lea beassan váikkuhit ođđa buvttadeapmái. Son sávvá ahte dat lea mielde movttiidahttime earáid dakkár ovttasbargguide.

– Norturas leat bures guldalan min ruovttoluottadieđuid dan boares joikabollerboksái, ja mii giitit buori ovttasbarggu ovddas. Dál mii leat ožžon buktaga, mii lea álbmoga favorihtta leamaš 1960-logu rájes, ođđa áigái, dadjá Hætta.

-Almmuhus-