-Almmuhus-
-Almmuhus-
-Almmuhus-
SMÁVVAOĐĐASATOvtta Ruoŧa stuorámus pop­násttiid lávlla ilbmá sáme­gillii

Ovtta Ruoŧa stuorámus pop­násttiid lávlla ilbmá sáme­gillii

-

-

Wenche Marie Hætta lea vuosttaš sámi artista guhte lávlu Per Gessle čállon lávlaga davvisámegillii. 

2017 geasi lei Wenche Marie Hætta vuosttaš háve Gessle-konsearttas, ja doppe čuojahuvvui «Första pris» lávlla, man lei gullan giđđat. Lávlla darvánii muitui, ja nu badjánii hállu jorgalit dan iežas eatnigillii.

Per Gessle lea dovddus Gyllene Tider ja Roxette joavkkuin, ja dát lávlla ilmmai su skearrus «En vacker natt» 2017:s.

Wenche Marie lea Gessle lobiin ieš jorgalan ja heivehan lávlaga mii lea ožžon nama «Váldovuoitu» sámegillii. 

Ovttasbargoguoimmit

Wenche Marie Hætta ovttasbargoguoibmi lea Kjetil Linnes. Soai leaba ovttasbargan go Wenche Marie almmuhii skearru «Jurdagat ja niegut» 2003:s.

Linnes lea čuojahan eanaš čuojanasaid ja lea buot jietnabargguid bargan. 

Fidjola čuojaha kanádalaš Ian Cameron. Son lea dovddus čuojaheaddji, ja lei earret eará 2013:s nominerejuvvon Grammy Awards bálkkašupmái luohkás buoremus instrumentála pop-skearru.

Giitevaš

«Váldovuoitu» muitala ahte olmmoš ii galgga áibbašit dasa mii ii leat, muhto baicca leat giitevaš dainna ahte eallá buori eallima. Jus dan nagoda, de gal olmmoš lea vuoitán eallima váldovuoittu.

Artista čállá preassadieđáhusas ahte su jurdagiin leat sii guđet rahčet eallimis, earenoamážit maŋŋel terrorfalleheami 22.7.2011, mii lea ain lossa beaivi máŋgasii.

Lávlla ilbmá Spotifys suoidnemánu 15. beaivvi.

-Almmuhus-