-Almmuhus-
OĐĐASATOvtta beaivvis 720 olbmuid dieđi­huvvon njommon covid-19

Ovtta beaivvis 720 olbmuid dieđi­huvvon njommon covid-19

-

-

Ovtta beaivvis lea 720 olbmui dieđihuvvon njommon covid-19 dávda.

Seamma beaivvi go Norgga ráđđehus lea dieđihan sii rahpet rájáid njukčamánu 1. beaivvi bargiide geat šaddet rasttildit rájá, de dieđihuvvo leat Suomas njoammunolahus.  Bearajadaga lea 720 olbmos duođaštuvvon korona dieđiha Suoma álbmotdearvvašvuođainstituhtta THL. 

– Dat lea dat alimus lohku mii lea duođaštuvvon ovtta beaivvis, dadjá njoammudávddaid spesialista Saara Jamanca Suoma ođasfitnodahkii  STT.

Giddejit njukčamánu 8. beaivvi

YLE Sápmi dieđiha ahte Suoma ráđđehus dieđihii duorastatiđida, ahte Suomas giddejit daid guovlluid gos korona lea leavvanmuttus. Gidden álgá njukčamánu 8. beaivvi ja dat bistá njukčamánu 28. beaivvi rádjái. Lappi gullá daidda guovlluide.

Dat mearkkaša ahte dain guovlluin váldet atnui dálá doaimmaid lassin maiddái gáiddusoahpahusa nuppi dásis ja vuođđooahpahusa badjeluohkáin. Dasa lassin badjel 12-jahkásaččaid joavkoastoáiggedoaimmat gaskkalduvvet. Studeantačállimiid dorvvolaš ordnema leat sihkkarastimin.

Lappi buohccedikšunbiirres leat ikte, duorastaga, gávdnan guhtta ođđa koronanjoammuma. Golbma dain leat Roavvenjárggas, guokte Gihttelis ja okta Kolaris.

Gihttela njoammun ja okta Roavvenjárgga njoammun lea gávdnon olgobáikegottálaččas.

Njoammudilli

Oktiibuot leat 56 407 suopmelačča ožžon duođaštuvvot virusnjoammuma. Suomas leat duođaštuvvon 742 jápmán koronadávdda geažil. Seammás leat birrasii  350 000 ožžon boahkuid virusa vuostá. Dieđihuvvo leat vuorjašupmi dan ođđa virusmutašuvdnii. Suomas lea dieđihuvvon 1200 olbmos duođaštuvvon muterejuvvon virus.

-Almmuhus-