Porsáŋggu gielda dieđihii maŋŋit eahkedis maŋŋebárgga ahte dál lea okta gielddabargi buhcciidossodagas duođaštuvvon covid-19 positiivan.
– Porsáŋggu gielda oaččui maŋŋit maŋŋebárgga eahkeda dieđu ahte okta min bargiid buhcciidossodagas dál lea duođaštuvvon leat covid-19 positiivan. Dat olmmoš lea biddjon erremii ja dearvvašvuođabargit dikšot su. Maiddái lagašolbmot leat biddjon erremii ja mii leat guorramin gos njoammudávda lea vuolgán, lohká sadjásaš sátnejođiheaddji Sylvi J. Johnsen.
Porsáŋggu buhcciidossodagas lea hirbmat čavgadis galledandárkkisteapmi. Álbmot beassá dohko dušše hui earenomáš dilis jus lea šihtton ovddalgihtii.
