Sámediggi čájeha ođđa lahkoneami sáivaguollebivddu hálddašeapmái Finnmárkkus, molssaeaktun dasa ahte máhcahit obbalaš 5-kilomehtera ráji.
Sámediggi čájeha ođđa lahkoneami sáivaguollebivddu hálddašeapmái Finnmárkkus, molssaeaktun dasa ahte máhcahit obbalaš 5-kilomehtera ráji.
Sámediggi lea árvvoštallan rievttálaš doaibmanmuni Finnmárkkuopmodaga sáivaguollebivddu muddemii, maiddái vejolašvuođa fas máhcahit dan nu gohčoduvvon 5-kilomehtera ráji, čállá Sámediggi preassadieđáhusas ja čujuha go FeFos lea aitto leamaš evttohus dán ráji máhcaheami birra gulaskuddamis.
Sáhttá buktit stuora váikkuhusat
Sámedikki fágalaš árvvoštallan lea ahte vaikko FeFo juridihkalaččat sáhttá máhcahit 5-kilomehtera ráji geainnuin eret Finnmárkkus mas gieldá guollebivdima olbmuide geain ii leat lagas čanastat Norgii dahje eará muddemiid dán guollebivdijovkui vástideaddji váikkuhusain, de sáhttá liikká jearrat leago go dán mearrádusa máhcaheapmi dat buoremus muddendoaibma.
Sámediggi oaivvilda ahte obbalaš máhcaheapmi sáhttá buktit stuora váikkuhusaid árbevirolaš meahcásteapmái guovlluin giliid lahkosis maid dávjá mánáidbearrašat ja vuorasolbmot geavahit, ja dalle ferte vuordit ahte guollebivdin boahtá ollu lassánit guollejávrriin giliid lahkosis, daddjo árvvoštallamis.
– Mus leat stuora vuordámušat ahte ođđa FeFo stivrras lea áigumuš láhčit sáivaguollebivddu hálddašeami nu ahte eahpitkeahttá lea buorrin olbmuide Finnmárkkus, seammás go jierpmálaš vuogi mielde láhččojuvvo dilli guollebivdiide geat deike bohtet, dadjá sámediggeráđđi Silje Karine Muotka.
Earuheapmi iešguđet joavkkuid gaskkas
Sámediggi oaivvilda fágalaš árvvoštallamis geahčadan maid Finnmárkkuláhka suovvá FeFo bargat guollemuddemiin eará lágaid ektui, ja makkár rámmaid láhka addá muddet báikkiolbmuid geavahanvuoigatvuođa, Finnmárkku álbmot guollebivdinvuoigatvuođa ja earáid lobi beassat bivdit sáivaguliid.
Árvvoštallamis čájeha Sámediggi maiddái ođđa lahkoneami guollehálddašeapmái, mas FeFo eanet earuha iešguđet guollebivdiid joavkkuid ja mas ásaha iešguđet muddemiid viidodaga ja sisdoalu dáfus, ja mas báikkiolbmuin galgá leat ovdamunni beassat guolleresurssaide.
FeFo sáhttá ovdamearkka dihte eaktudit muhtun guovlluid dahje guollejávrriid vuoigatvuođalaččaide Finnmárkkus, dahje dušše báikkiolbmuid suovvat geavahit fatnasiid.
Dakkár čoavddus boahtá oidet báikkiolbmuid vuoigatvuođaid eambbogo obbalaš 5-kilomehtera rádji, ja addá maid buoret čuozahusa, dadjá sámediggeráđđi.
– Mun sávan dát lea buorre buvttus servodatdigaštallamii ja mii váldá min ovtta lávkki guhkkelii ráhkadit buriid, geavatlaš ja rievttes čovdosiid sáivaguollebivdui, dadjá Muotká preassadieđáhusas.
Váldit vuhtii sámi ja báikkálaš meahcásteami
Sámediggi čállá viidáset árvvoštallamis ahte FeFo dárbbaša eambbo máhtu muđui sihke sámi ja báikkiolbmuid meahcceguovlluid geavaheami ja sáivaguollebivddu birra. Báikkálaš- ja árbevirolaš máhttu berre leat guovddáš oassi FeFo hálddašeami máhttovuođus.
– FeFo berre farggamusat ásahit hálddašeami mii oktiivástida vuoigatvuođadilálašvuođaiguin Finnmárkkus ja mearridit muddemiid mat oktiivástidit Finnmárkkulágain, álbmotrivttiin ja sámi riekteáddejumiiguin sáivaguollebivddu dáfus, loahpaha sámediggeráđđi preassadieđáhusas.