Dál lea čájálmasmátki ollen Romsii ja Finnmárkui. Čájálmas maid olu geahččit lohket garrasit čuohcat.
«Olbmot» čájálmas, man álgočájálmas lei Svalbárddas Sámi Álbmotbeaivvi, álggahii čájálmasmátkkis Oslos, ja dál lea ollen Romsii ja Finnmárkui. Vuosttaš čájálmasbáiki Finnmárkkus lea Áltá, gos čájehuvvo njukčamánu 3. beaivvi.
– Čájálmasmátki lea mannan bures, ja «lea čájálmas mii čuohcá garrasit» nu go ollu geahččit leat dadjan maŋŋel čájálmasa, dieđiha Sámi Nationálateáhter Beaivváš.
Earálágan teáhtervásáhus
«Olbmot» lea šaddan čájálmassan mas ii leat nu dábálaš čájehallan- ja muitalanvuohki. Leat unnán sánit ja ollu musihkka, ja maid govvasárggusráiddut. «Olbmot» čájálmasa álgobarggut álge juo bealgoalmmát jagi áigi.
Dán čájálmasas čájehit osiid dáhpáhusain nállebiologiija olis, ja mii leat mearridan njealje fáttá, mat leat oaivemihtidemiid Sámis, álbmotjávkadeapmi fáŋgaleairrain, Afrihká koloniseren ja cornflakes USA:s.
Gáržžes lávddis leat mielde guokte teknihkkara, njealje čuojaheaddji ja gávcci neavttára. Nuoramus lea 19 jagi ja boarráseamos 64.
Čájálmasmátki joatkká vel Romsii, Ráisii, Áltái, Detnui, Ohcejohkii, Anárii, Kárášjohkii ovdal go loahpahuvvo Guovdageainnus njukčamánu 23. beaivvi.
