Áhkuid ja ádjáid dálkkádatakšuvdna searvá Greenpeace ja Natur og Ungdom stevdnema stáda vuostá go áigot bissehit oljobohkamiid Barentsábis.
Áhkuid ja ádjáid dálkkádatakšuvdna searvá Greenpeace ja Natur og Ungdom stevdnema stáda vuostá go áigot bissehit oljobohkamiid Barentsábis.
Máŋga ovddeš stáhtaráđi leat miellahtut Besteforeldrenes klimaaksjon (Áhkuid ja ádjáid dálkkádatakšuvnnas), čállá Dagsavisen. Okta dain lea Gro Harlem Brundtlanda goalmmát ráđđehusa dearvvašvuođaministtar, Werner Christie.
– Mun doarjjun akšuvnna dan bealis go dat boktá digaštallama čuovvu go oljopolitihkka bajit olmmošvuoigatvuođaid mat gullet oadjebasvuhtii heajos dearvvašvuođa ja luonddubillisteami ektui, muitala Christie.
Maiddái ovddeš stáhtaministtar Kåre Willoch ja ovddeš birasministtar Willoch ráđđehusas, Rakel Surlien, leaba Áhkuid ja ádjáid dálkkádatakšuvnna miellahtut.
– Stuora áittan
Greenpeace ja Natur og Ungdom čuoččuhit Vuođđolága paragráfa 112 rihkkon go stáda mearridii álggahit oljobohkamiid ođđa guovlluide Barentsábis. Birasparagráfa vuođđolágas čuožžu ahte stáda galgá suddjet luonddu ja birrasa boahttevaš buolvvaide.
– Ii leat mihkkege mii áitá globála dearvvašvuođa eambbo go jus dálkkádat rievdá garrasit. Nealgeáiggit, báhtareamit ja riiddut geafivuođa dihte, ja heajos eallindilit máŋgga miljovnna olbmui čuožžila, mii fas dagaha dávddaid mat leat dakkár viidodagas maid eat goassege leat oaidnán dán máilmmis, joatká Christie.
Diggi álgá Oslo diggegottis skábmamánu 14. beaivvi.
(©NTB)
