-Almmuhus-
OĐĐASATOvddeš politiijabálvá láidesta čuovvolanbarggu Divttasvuonas

Ovddeš politiijabálvá láidesta čuovvolanbarggu Divttasvuonas

-

-

Divttasvuona suohkan lea virgádan prošeaktajođiheaddji. Tor Erik Rønne galgá čuovvolanbarggu jođihit, čuovvolit gillájeddjiid ja guhkitáiggi eastadandoaimmaid álggahit vai eai dáhpáhuva eambbo rohcošeamit.

Tor Erik Rønne (44) lea 17 jagi leamaš politiijabálván, smávit suohkaniin ja stuora gávpogiin, gos eastadanbargu lea guovddážis.

Sus lea lassin politiijaohppui, liigeoahppu universitehtain ja allaskuvllain. Earret eará eastadanbarggus, kriminologiijas, gulahallan mánáiguin ja nuoraiguin, bagadallanpedagogihkas ja movttiidahttinjearahallamiin, dieđiha Divttasvuona suohkan preassadieđáhusas.

 

Illudahtti

– Mii leat hui movttegat go Rønne lea háliidan leat min miellagiddevaš prošeavtta jođiheaddjin. Sus lea máŋggafágalaš máhttovuođđu, ja vallji hárjáneapmi ovdánahttinbarggus, ja ovttasbarggus mas olu etáhtat leat oassin. Dat mearkkaša ahte sus lea máhttu, ja dasa lassin persovnnalaš iešvuođat mat dagahit ahte mii illudit ovttasbargat suinna, lohká Divttasvuona ráđđeolmmái Arne Kvensjø.

Tor Erik Rønne álgá dan bargui ođđajagemánus boahtte jagi.

Čuovvolanprošeakta Jasska álggahuvvui juo mannan čavčča, maŋŋil go bođii ovdan man olu rohcošanáššit suohkanis leat.

 

Čuovvoleapmi ja eastadeapmi

Leat guokte váldogeainnu čuovvolanbarggus; Čuovvolit gillájeddjiid ja earáid geaidda ášši guoská, ja eastadanbargu, mas leat guhkitáiggi perspektiivvas doaimmat.

– Go prošeaktajođiheaddji lea virgáduvvon, de leat ožžon dehálaš oasi sadjái. Dál fertet ovddos geahččat. Leat olusat geat leat, ja bohtet leat oassin čuovvolanbarggus. Ovttas galgat ražastit vai Divttasvuona álbmogis galgá oadjebas ja buorre boahtteáigi, lohká ráđđeolmmái.

 

Bistá bealgoalmmát jagi

Gielda- ja ođasmahttindepartemeanta lea juolludan 7,5 miljovnna čuovvolanbargui, mii bistá bealgoalmmát jagi.

Nordlándda fylkkamánni koordinere prošeavtta.

Prošeakta nohká 2019:s. Prošeaktajođiheaddjis lea váldoovddasvástádus čađahit prošeavtta ja hábmet ollislaš bajásšaddanplána.

-Almmuhus-