Ovddeš fylkkamánnii ja stádačállii Svein Ludvigsen dupmehalai Davvi-Norgga diggegottis viđa jahkái giddagasii go lea boastut geavahan iežas virggi oažžun dihte sexa golmma nuorra dievddus. Ludvigsen guoddalii duomu go dat celkui.
Ludvigsensa bealušteaddji dadjá iežas klieantta hirpmáhuvvan ja behtohallan duomuin. Dan dihte guoddala sihke duomu ja láhkageavahusa, muitala bealušteaddji, dieđiha NTB.
Ii leat diehttelas ahte Ludvigsen oažžu geahččalit ášši bajit dikkis, čállá Nordlys.
Sáhttá hilgut guoddaleami
Ludvigsena duomus ii leat ráŋggáštusáigi eanet go guhtta jagi, ja nu sáhttá lágamánneriekti biehttalit meannudit guoddaleami jus eai jáhke guoddaleamis ávkki, čállá Nordlys.
– Jus lágamánneriekti oaivvilda ahte eai leat ákkat mat nannejit ahte ášši dárbbašit guoddaleami, de sii hilgot guoddaleami, nu dajai aktor áššemeannudeamis, čilge stádaadvokáhta Tor Børge Nordmo Nordlysii.
Riekti guovtti meannudeapmái
Nordmo čilge ahte buohkain leat riekti oažžut geahččaluvvot ášši riektevuogádagas guovtte geardde. Go lágamánneriekti meannuda ovtta guoddaleami, de lea ášši geahččaluvvon dikki ovddas.
Nordmo čilge Nordlysii lágamánnerievtti sáhttit meannudit dušše oasi guoddaleamis ja ii olles ášši.
Ludvigsen dupmehalai viđa jahkái giddagasii, ja máksit oktiibuot 473 000 ruvnno buhtadusa dan 25 jahkásaš divdui, guhte lea loavkašuvvon guovtti váldočuoggás áššáiduhttimis.
Ludvigsen šaddá maid máksit 120 000 ruvnno ja 150 000 ruvnno buhtadusa dan guovtti eará loavkašuvvon dievddu guoktái.
Duopmu dattege ii leat vuos fámus, go Ludvigsen lea guoddalan dan.
