Fredrik Prost lea okta dain gii ovddasta sámeduojáriid duodjemeassuin mat álget ihttin Reykjavikas Islánddas.
Fredrik Prost lea okta dain gii ovddasta sámeduojáriid duodjemeassuin mat álget ihttin Reykjavikas Islánddas.
Viđa beaivái čoagganit duojárat miehtá davviguovlluid Islándda oaivegávpogii “Circum-Arctic Art Show” nammasaš lágidemiide. Okta dain gii searvá doaluide lea Ruoŧabeale Sámi duojár Fredrik Prost.
Ávvir lea ožžon su čilget mat dat leat doaluid ja movt leat fuomášan vuolgit dohko.
– Dá lea dakkár dáiddačájáhus masa mun ožžon bovdejumi searvat. In dieđe maid galggan dan birra humadit. Ihttin galgá leat almmolaš rahpan. Dáid doaluid lágidit stuorra konferánssa oktavuođas, čilge Fredrik Prost.
“Circum-Arctic Art Show” leat doalut mat lágiduvvojit vuosttaš háve mainna háliidit čalmmustahttit álgoálbmogiid duodjekultuvrraid. Lágideamit leat čadnon “Arctic Circle” nammasaš konferánsii mii lágiduvvo golggotmánu 16.-18. beivviid Reykjavikas.
– Háliidit deattuhit árktalaš kultuvrraid ovdáneami sin dujiid bokte. Loktet dáid dujiid mearkkašumi ođđaáigásaš dáidaga vuogádagas. Seammás addit gehččiide vejolašvuođa oahpásnuvvat álgoálbmot eallinvuohkái, čállet lágideaddjit.
– Ságastit olbmuiguin
Prost mielas lea dehálaš humadit eará guovlluid olbmuiguin.
– Dieđus juste dál ii dieđe maid galgá vuordit. Sávvamis beasat juoidá vuovdit. Muhto ollu deháleabbo lea deaivvadit eará álgoálbmotguovlluid duojáriiguin. Somá dáiguin ságastit, muitala duojár.
Reykjavikas vurdet doaluide 30 duojára Kanadas, Alaskas, Sámis, Ruonáeatnamis, Nenetsa-, Sakha-, ja Chukotkaguovlluin Ruoššas. Sámi ovddastit Fredrik Prost, Larissa Avdeeva ja Per-Stefan Idivuoma.
