Nuorra sámi nieida Ida Emilie Lindseth (14) galgá ovddastit Norgga riikajoavkku nuoraid máilmmimeasttirgilvvuin dánsumis. Geahča video áššis.
Nuorra sámi nieida Ida Emilie Lindseth (14) galgá ovddastit Norgga riikajoavkku nuoraid máilmmimeasttirgilvvuin dánsumis. Geahča video áššis.
Norgga dánsunlihttu lea válljen 24 seniora ja juniora dánsejeaddji geat galget ovddastit Norgga discoformašuvnna dánsumis máilmmimeasttirgilvvuin Tsjekkias geassemánu 22.- 25. beaivvi. Geahča video vuollelis áššis.
14-jahkásaš Ida Emilie Lindseth leage okta juniorain.
– Lea hui somá go válljejuvvojin ovddastit Norgga, hui stuoris ja lean hui čeavlái dainna, lohká son.
Norgga buoremusat
Ida Emilie muitala son lei mannan sotnabeaivvi auditionis ja doppe válljejedje geat galget ovddastit Norgga.
– Mun válljejuvvojin ovddastit Norgga joavkku dánsumis, discoformašuvnnas. Dat lea dánsun mas olles joavku dánsu ovtta ládje, ja ulbmil lea geahččalit váddáseamos cehkiid dánsut vai oažžu eanemus čuoggáid. Discoformašuvnna máilmmimeasttirgilvvut leat njealji oasis, disco, jazzdance, ođđaáigásaš dánsa ja showdance.
– Leat stuora gilvvut gos leat birrasii 2000 oasseváldi, nu ahte lea gelddolaš čuovvut máilmmimeasttirgilvvuid, lohká son.
Áigu geahččalit solo maid kvalifiseret
Ida Emilie muitala son áigu dál ovddasguvlui searvat gilvvuide main sáhttá kvalifiseret iežas disco solo dánsumii.
– Lean juo kvalifiserejuvvon joavkodánsumii, ja livččii hui miella beassat okto dánsumis maid ovddastit Norgga máilmmimeasttirgilvvuin, lohká son, ja vaikko leat ollu čeahpes dánsejeaddjit, de áigu goit geahččalit.
(Ášši joatká filmmaža vuolábealde)
– Movt galgá šaddat čeahppi dánsumis?
– Jus galgá šaddat čeahppin, de ferte leahket soddjil, lášmat, máhttit bures lihkahallat rupmaša ja seammas ferte váldit koreografiija jođánit. Ferte maid leahkit viššal hárjehallat, muitala son.
Ida Emilie hárjehallá ge viđa geardde vahkkus, birrasii 20 diimmu, ja leage jođus hárjehallamii go Ávvir hupmá suinna telefuvnna bokte.
Máhccan álo dánsumii
Ida Emilie áhčči lea kárášjohkalaš Daniel Lindseth ja sii orrot dál Lulli-Norggas, Skjetten suohkanis.
Daniel Lindseth, gii lea ovddeš spábbačiekči, muitala son ii ieš gal ipmir nu ollu dánsumis, muhto lea somá čuovvut nieiddas.
– Ida Emilie lea dánson dan rájes go lei viđajahkásaš, ja lean dan rájes čuvvon, dolvon ja viežžan hárjehallamiidda. Son lea geahččaladdan eará faláštallansurggiid, nu movt spábbačiekčama, giehtaspáppa, muhto lea álo fas máhccan dánsumii, muitala Lindseth.
Čakčii ges lea Ida Emilies mihttu kvalifiseret Europameasttirgilvvuide, mat leat Vilgesruoššas.
