Ovdánahttit mátkeealáhusa

– Lujávrri eatnamat lea guovlu mas lea stuorra ovdamunni mátkeealáhussii. Guovllu objeavttat nu mo Seadjávri, leat beakkán viidá miehtá riikka ja olggobeale riikka. Dát geasuhit jahkásaččat duháhiid mielde mátkkošteddjiid. Dađi bahábut dát eai leat organiserejuvvon mátkkiid mátkkošteaddjit, sii buktet eambbo váttisvuođaid guvlui go buori. Min oktasaš ulbmil lea dahkat mátkeealáhusa suohkanis organiserejuvvon hámis, muitala Murmánskka guovllu sátnejođiheaddji Marina Kovtun preassadieđáhusas.

Ávžžuhit sápmelaččaid leat aktiiva

Šiehtadusa ulbmil lea ovdánahttit etnográfalaš ja boaittobeale guovlluid mátkeealáhusa.

– Dál lea jo jođus bargu, oažžut mielde sámi ealáhusfitnodagaid ja joavkkuid guovllu mátkeealáhussii. Muhto ávžžuhan Lujávrri suohkana ássiid ja sámi ealáhusfitnodagaid leat eambbo aktiiva barggus.

Murmánska guovllu sátnejođiheaddji sániid mielde leat Lujávrris ollu dáhpáhusat, mat sáhttet leat geasuheaddjin. Sámi álbmotbeaivi, Davviriemut ja boazodolliid beaivi, komiálbmoga beaivvit ja árbevirolaš sámi geasseriemut.