Lea stuorra dárbu eanet sámi oahpponeavvuide. Romssa ja Finnmárkku fylkkagielda nanne áŋgiruššama ja ovdánahttigoahtá ođđa sámi oahpponeavvuid eanet fágaide.
Romssa ja Finnmárkku fylkkagielda lea ovdánahttigoahtán ođđa sámi oahpponeavvuid ovttas NDLA:in (Nasjonal digital læringsarena). Kongsbakken joatkkaskuvllas leat juo bargagoahtán álggahanprošeavttain ovdánahttit sámi oahpponeavvuid luonddufágii.
Dál viiddiduvvo prošeakta ja áigumuššan lea ráhkadit ođđa sámi oahpponeavvuid maiddái servvodatfágii, historjái, sosiologiijai ja sosiálaantropologiijai, dieđiha fylkkagielda preassadieđáhusas.
– Lea stuorra dárbu eanet sámi oahpponeavvuide. Dárbbašat dáid vai nákcet fállat buori oahppofálaldaga buot iežamet ohppiide. Dát boahtá maiddái buorrin eará sámegielhálli ohppiide riikkas. Danne lea ge dehálaš vuoruheapmi fylkkaráđis, dadjá Romssa ja Finnmárkku fylkkaráđijođiheaddji Kristina Torbergsen (Bb).
Fylkkaráđđi evttoha juolludit 2 miljovnna ruvnno 2023 bušeahtas ovdánahttit digitála oahpponeavvuid main lea sámi sisdoallu.
Nannejit áŋgiruššama
Davvi-Romssa joatkkaskuvllas lea dehálaš rolla ovdánahttit sisdoalu sámegiela fágaide, ja Kongsbakken joatkkaskuvla ges ovdánahttá sisdoalu servvodatmáhtolašvuođa, historjjá, sosiologiija ja sosiálaantropologiija fágaide. Dat guokte skuvlla leat njealji Romssa ja Finnmárkku fylkkagieldda sámi oahpahusresursaskuvllain.
– Mii leat geavahan miljovnna sámegieloahpaheddjiide joatkkaohppui dan maŋemuš guokte jagi, ja mii leat geavahan olu návccaid háhkat ohppiid sámegieloahpahussii. Dál áigut váikkuhit nu ahte ovdánahttit sámi oahpponeavvuid joatkkaskuvlii, dadjá máhtu- ja ovttaidahttima fylkkaráđđi Bjarne Rohde (SG).
Prošeavtta lea oahppodirektoráhtta ja Romssa ja Finnmárkku fylkkagieldda oahpahus ossodat oarji/Romsa ruhtadan.
Ođđa oahpponeavvut leat olámuttos ndla.no:s.
