Anneli Drecker lei doivon ahte galggai dušše oahpásmuvvat ođđa lávlunteknihkaide, muhto nákkáhallama barggustis lea ožžon ollu eará. Son lea beassan oaidnit eamiálbmogiid identitehtaid ja historjjáid, ja lea giitevaš go eallá riikkas gos lea lohpi lávlut.
Anneli Drecker lei doivon ahte galggai dušše oahpásmuvvat ođđa lávlunteknihkaide, muhto nákkáhallama barggustis lea ožžon ollu eará. Son lea beassan oaidnit eamiálbmogiid identitehtaid ja historjjáid, ja lea giitevaš go eallá riikkas gos lea lohpi lávlut.
Disdaga nákkálahalai Anneli Drecker iežas prošeavtta ovddas «Ođđaáigásaš álgojietna. Ođđasit hábmen ja geavaheapmi álgojienas».
Mihttu lei oahpásmuvvat ođđa teknihkaide lávlumis, ja son lea guorahallan čottálávlunvuogi, bajitjienalávlunvuogi, juoigama, kapa haka, persalaš ja árbevirolaš lávlunvuogi Norggas.
– Dál in nagot bidjat dan eret. Lea šaddan oassin mus, mu jienas ja mu lávlunvuogis. Lean ožžon ođđa ivnniid iežan palehttii, muitala Drecker Romssa árktalaš universitehta preassadieđáhusas.
Háliida romisvuođa popkultuvrii
Drecker lea popartista ja komponista, ja lea earret eará geavahan čottalávluma iežas musihkas.
Lávlunvuohki mii vuolgá guovžajienain ja lei elemeanttan olbmuid birgejumis go deaivvadedje guovžžain.
– Oarjemáilmmis fokuserejit ollu dan šuoŋalačča ja čábbá. Mii eat leat nu bures bargan gávdnat kontrásttaid. Dat lea relevánta bargat rumašlaš jienaiguin, dahje álgojienaiguin, ja dat lea mu mielas gelddolaš. Popkultuvrras lea fiinnisvuohta mii lea guovddážis. Mihttu lea váldit «romes» oasi popkultuvrii. Mun barggan olahit dan, ja gávdnat ođđa estetihka man sáhtán váldit mielde popkultuvrii, lohká son.
– Ii sáhte gárvvuhit earáid kultuvrrain
Eai leat dušše ođđa jienat maid Anneli Drecker lea gávnnahan iežas nákkosbarggus.
Musihkkamáhku lea rievdan, muhto eanemusat lea son ožžon ipmárdusa eamiálbmogiid identitehtii ja historjái.
– Mus lea vuollegašvuohta dan barggu ovddas maid barggan. Ii leat dušše teknihkka man lean oahppan, nu go álggos doivon oahppat. Lean gullan ollu historjjáid, ja ovdamearkka dihte lea okta mu rávvejeddiin muitalan ahte son ii beasa lávlut sin árbevirolaš lávlagiid dan sivas go lea nissonolmmoš. Lean giitevaš go orun riikkas gos beasan lávlut, lohká Anneli.
Drecker lea maid eanet oahpásmuvvan luohtái ja sámiid historjái.
– In goassege daja ahte mun juoiggan. Luohti lea inspireren mu, go ii sáhte gárvvuhit iežas earáid kultuvrrain, lohká son loahpas árktalaš universitehta preassadieđáhusas man leat almmuhan iežaset neahttasiiddus.
