Diibmá válljejedje gaskal 84,4 ja 91,4 proseantta 16-jahkásaš nieiddat HVP-boahkuheami mánáidboahkuhanprográmma bokte, čájehit Nášunála Dearvvašvuođainstituhta logut.
HVP-boahkuheapmi sáhttá eastadit mánágoaŧŧočeabetborasdávdda.
Eanemusat boahkuhedje nieiddat Opplánddas, gos 91,4 proseantta buot 16 jahkásaš nieiddain válljejedje boahkuhuvvot diibmá.
Vuolimus boahkuhanproseanta lei Finnmárkkus, gos 84,4 proseantta nieiddain válljejedje boahkuhuvvot.
Elisabeth Jakobsen Borasdávdaregisttaris dadjá lea buorre go nu ollugat válljejit boahkuhuvvot.
Logut čájehit dássedis lassáneami oppa Norggas jagi 2013 rájes.
Vejolaš eastadit
Mii jáhkkit nanu boahkuheami ja beaktilis dárkkisteami sáhttit váikkuhit dasa, ahte mánágoaŧŧočeabetborasdávda šattašii hárvves lágan dávdan, sihke Norggas ja internátionála dásis, dadjá Jakobsen.
Jagi 2009 rájes leat buot čihččet luohká nieiddažat boahkuhuvvon, guovtti boahkuheami bokte.
Mannan skuvlajagis leat maiddái gánddat ožžon nuvttá boahkuhanfálaldaga mánáidboahkuhanprográmma bokte.
HVP lea sivvan badjel 100 borasdávdii dievdduin ja lagabui 500 borasdávdda sivvii nissoniin jahkásaččat, muitala Álbmotdearvvašvuođainstituhta doavttir Margrethe Greve-Isdahl.
Nuvttá 2-jagi boahkuhanprográmma loahpahuvvui geassemánus. Logut dássážii čájehit ahte badjel 120.000 olbmo leat ávkkástallan nuvttá fálaldagas.
Nissonat geat eai vel leat ollen gárvet boahkuheami áigemeari sisa, šaddet ieža máksit loahppa boahkuheami ovddas. Haddi ávžžuhuvvon golmma boahkuheamis lea 4000 ruvnno. Greve-Isdahl ávžžuha nissoniid gárvet boahkunprográmma.
