Suoidnemánus eai duššan liikká máŋggas johtolagas go geassemánus, muhto logut leat ain beare badjin, oaivvilda Stáhta geaidnodoaimmahat.
Geassejohtolagas suoidnemánus dušše oktiibuot ovcci olbmo miehtá Norgga. Dat lohku lea vihtta unnit go geassemánus ja golbma unnit go diimmá suoidnemánus, čájehit Stáhta geaidnodoaimmahaga logut.
– Vaikko dán jagi eai duššan suoidnemánus liikká máŋggas go geassemánus, de leat ain beare máŋggas geat duššet johtolagas, dadjá Stáhta geaidnodoaimmahaga johtolatsihkarvuođa doaibmi ossodatdirektevra Hilde Halås Hasseløsæther preassadieđáhusas.
Ii oktage duššan Romssas dahje Finnmárkkus. Nordlánddas duššai okta olmmoš johtolatlihkohisvuođas.
Stuorát riska mohtorsihkkeliin
Golmmas sis geat dušše suoidnemánus ledje vuodjime dahje mátkkošteame mohtorsihkkeliin.
– Mohtorsihkkelvuoddjit eai leat liikká bures suddjejuvvon go biilavuoddjit, muhto sii vudjet seamma leahtuin. Danne leat stuorát várra garrasit roasmmehuvvat dahje jápmit mohtorsihkkellihkohisvuođas. Nuorain geat vudjet geahppamohtorsihkkeliin lea dasa lassin dat raššivuohta ahte sis lea oalle unnán johtolatvásáhus boarráset johtaleddjiid ektui. Lea gáibideaddji vuodjit mohtorsihkkeliin ja váikkuhusat sáhttet leat stuorrát jus dahká boasttuvuođaid. Eanaš jápminlihkohisvuođat mohtorsihkkeliin dáhpáhuvvet go vudjet badjel luotta mohkkasis, dadjá Halås Hasseløsæther.
