Cuoŋománu 1.beaivvi rájes gitta borgemánu 20. beaivái galget beatnagat leat gitta miehtá Norgga.
Cuoŋománu 1.beaivvi rájes gitta borgemánu 20. beaivái galget beatnagat leat gitta miehtá Norgga.
Biebmobearráigeahčču muittuha beanaeaiggádiid doallat beatnagiid gitta báttis. Oppalaš bággoveaddin lea áigodat jagis go beatnagat galget leat báttis gitta dahje siskkobealde áiddi olles áiggi. Bággoveaddin ii guoskka muhtin bivdo- ja bargobeatnagiidda mat leat doaimmalaš barggus dahje hárjehallamis.
– Eallit leat hui hearkkit dán áigodaga. Ferte garvit ahte beatnagat eai baldde dahje oagut lottiid, fuođđoelliid dahje elliid mat leat guohtume. Lea maid áigodat go olbmot leat ollu olgun. Ferte veaddit beatnaga vai earáid ii muosehuhte, dadjá biebmobearráigeahču seniorráđđeaddi Ole-Herman Tronerud.
Sierra njuolggadusat muhtin báikkiin
Olu suohkaniin leat sierra guovllut gos sáhttá diktit beatnagiid luovos birra jagi vaikko lea bággoveaddináigodat. Muhtin fylkkat ja suohkanat leat ráhkadan sierra njuolggadusaid muhtin guovlluide go lea bággoveaddináigodat. Váldde oktavuođa iežat suohkaniin jus it dieđe leat go báikkálaš njuolggadusat gos sáhttá diktit beatnaga leat luovos.
Jus oainnát beatnaga mii ii leat gitta, de sáhtát váldit beatnaga gitta ja doalvut beanaeaiggádii. Jus it dieđe gii lea beanaeaiggát, de fertet jođánepmosit doalvut beatnaga politiijaide. Beanaeaiggát, gii ii čuovo bággoveaddinnjuolggadusaid, sáhttá maid sáhkkohallat, dieđiha Biebmobearráigeahčču.
