NAF gáibida eanet jođánisláddenrusttegiid.
Čakčamánu leat badjel 90 proseantta ođđabiillain mat leat vuvdon, leamaš elbiillat. Dál bivdá NAF eanet dieđuid geavaheddjiide ja eanet láddenrusttegiid, čállá NAF preassadieđáhusas.
Logut dán rádjái čakčamánus čájehit ahte leat 7500 elbiilla vuvdon, ja ollislaččat 9600 ođđa biilla.
– Dat lea ođđa olahus, ja leat historjjálaš alla logut. Dál fertejit politihkkárat morihit. Min boahtte johtalusministtar boahtá dillái go váilot badjel 1000 jođánisláddenrusttega vai leat doarvái láddarenrusttegat. Min rehketbihttá čájeha ahte váldoluottain leat váilevaš láddarat, nu go Oslo ja Kristiansanda gaska, ja Oslo – Troandin, dadjá Thor Egil Braadland, NAF ráđđehusoktavuohta.
Kunddáriid rievttit
Braadland oaivvilda ahte politihkkárat fertejit gozihit geavaheaddjerivttiid.
– Dán jagi vuvdojit badjel 100 000 ođđa elbiilla nu ahte geavaheaddji ii dieđe man guhká bistá elrávdnji biillas dálvet dahje man jođánit dan ládde. Kundariid vejolašvuohta buohtastahttit elrávdnjekapasitehta ja láddenáiggi ferte jođánit buorránit, dadjá Braadland.
NAF lea danne gáibidan ahte kundarat ožžot diehtit láddenáiggi, nu go man guhkes áiggi ádjána láddet 10 proseanttas gitta 80 prosentii, juoga mii ii leat gáibádus dál.
NAF maid gáibida buhtadusortnega oasuservviide ja garášaide ásahit láddenrusttegiid, ja ahte elbiillain ii galgga momsa ovdal 2024 go árvvoštallet easka de leat gilvovuoimmálaš.
