-Almmuhus-
Sámi álbmotbeaivi OSLO: Sámi Super Friday

OSLO: Sámi Super Friday

-

-

Čoahkkanit ráhkadit dušše sámi borramušaid

11 biepmobuvdda čoahkkanit ovtta dáhki vuollai.  Sii bidjet eret iežaset biepmovieruid ja ráhkadit dušše sámi biepmu. 

Guovvamánu 7. beaivvi, lágida Vippa, Sámi álbmotbeaivvi oktavuođas, Sámi Super Friday. Dán oktavuođas lea Vippa Oslo bovden Máret Rávdná Buljo sin lusa oahpahit ja ráhkadit sámi árbevirolaš biepmu. 

Máret Rávdná Buljo lea dovddus sámi biebmoáŋggirdeaddji. Son lea aitto ožžon Ingrid Espelid Hovig biebmokultuvra-bálkkašumi. Buljo lea ovttasráđiid Vippa biebmobáikkiin ráhkadan borramušfálu sámi biepmuid vuođul.

Oktasaš biebmoipmárdus

Máret Rávdná Buljo muitala son illuda vuolgit Osloi, go dal lea leamaš doppe ja dearvvahan Vippa bargiid.

Buljo beasai oaidnit maid sii máhtte ja movt sii barge, ja su mielas ledje dat iešguđetlágan biebmokultuvrrat hui ovttaláganat. 

– Mun ledjen doppe doallame logaldallama sámi biepmu birra, ja mii hutkkaimet fárrolaga movt ja maid mii galgat ráhkadit. Lei hui somá oaidnit ahte muhtin olbmuin lei seammalágan jurddašanvuohki biebmovieruid ektui go mis sápmelaččain, ovdamearka dihte de ráhkadit espánnjalaččat varrabánnegáhkuid seamma ládje go mii, ja marokkolaččain ges lei seammá vuođđoipmárdus go mis biđđima ektui, muitala Buljo. 

11 biebmobuvdda 

11 biepmobuvdda čoahkkanit ovtta dáhki vuollai.  Sii bidjet eret iežaset biepmovieruid ja ráhkadit dušše sámi biepmu. 

– Biepmoávdnasat maid mii jurddašit geavahit leat muorjjit, goikeguolli, mearaguolli, čuovžža, bohccovara ja bierggu, šattuid nugo gáskálasrási, boskka, juomu ja maiddai olu eará, muitala Buljo. 

Buljos leat stuora vuordámušat, ja doaivu boahtit olu olbmuid boradit. 

– Mun lean ovdal vásihan ahte sápmelaččat Oslos váillahit sámi biepmuid go lea dakkár doalut nugo sámi álbmotbeaivi. Dal lea sidjiide vejolaš boahtit borrat sámi biepmu ja dovdat ruovttudovddu, muitala Buljo. 

Ovddastit sámi

Máret Rávdná  vuolgá Osloi ovttain mihtuin, ja dat lea ovddastit sámi ja sámi biepmu. Son muitala ahte lea čoaggan ráhkadanneavvagiid miehta sámi.

– Mun dovddan stuora ovddasvástádusa go galggan čájehit sámi biepmu olbmuide, go sámi biebmu ii leat nu oidnosis Norggas ja máilmmis. Muhto mun illudan nu sakka, áidna maid balan lea ahte mii nohkkot bibmui, muhto jus nu fal dáhpáhuvvá de fertet beare improviseret, bohkosa Buljo. 

Super Friday

Vippa beaivválaš jođiheaddji Kaja Skovborg-Hansen muitala ahte go Super Friday lágiduvvo, de guovdilastet dušše ovtta riika ja ovtta biepmokultuvrra. 

– Mii háliidat čalmmustahttit kultuvrraid mat leat šaddan oassin Norggas, ja sámi kultuvra lea hui dehálaš oassin Norggas, ja dat gálga oažžut eambbo fuomášumi, muitala Skovberg-Hansen. 

Skovberg-Hansen muitala maid ahte sámi biebmu lea alo gávdnon Norggas, muhto ii leat leamaš oidnosis ja ii danin ii leat beassan leavvat dainna lágiin go gálggašii, danne háliidat bovdet olbmuid Sami Super Friday:ai sámi álbmotbeaivvi oktavuođas. 

Giitevaččat

Vippa beaivválaš jođiheaddji Kaja Skovborg-Hansen sávvá ahte Sámi Super Friday sáhttá váikkuhit ahte olbmot ožžot eambbo árbemáhtu ja ipmárdusa sámi biepmu birra, ja ahte olbmot liikojit bibmui. 

– Mii leat nu rámis ja giitevaččat go Máret Rávdná boahtá min lusa. Go dan maid son bargá ja háliida ovddidit lea juoga maid mii háliidat doarjut ja veahkehit. Su máhttu sámi biepmu, vuođđoávdnasiid ja historjjá birra lea juoga maid mii ieža eat sáhtáše ipmirdit su haga, loahpaha Skovberg-Hansen. 

Vippa nammasaš biebmobáiki lea biebmo-, kultuvra ja oahppoguovddáš Oslos. Doppe sáhtát borrat ja oahppat  iešguđetlágan biebmokultuvrraid birra. 

- Advertisement -
-Almmuhus-