Gielda ostii 336 000 ruvnno ovddas sámeleavggaid. Sámi álbmotbeaivvi boahtte jagi galget dat libardit.
Oslo gielda dáinna háliida fuomášuhttit skuvllaid ahte dain lea stuorra ovddasvástádus oahpahit sámi kultuvrra birra.
– Dieđusge máksá dien mađe go nie olu leavggaid oastá, muhto mu mielas lea dát dehálaš. Jurddaš man ollu oahppit besset oaidnit leavgga. Muhtumat dáin besset čevllohallat ja leat rámis leavggain, ja earát ges háliidišgohtet oahppat eanet dan birra. Dalle lea maid buorre vuođđu skuvllain eanet ovddidit sámi kultuvrra, lohká Oslo gieldda Oahpahusetáhta direktevra Marte Gerhardsen NRK Sápmái.