-Almmuhus-
-Almmuhus-
OĐĐASAT– Orru nu ahte šaddá oalle čáppa dálki

– Orru nu ahte šaddá oalle čáppa dálki

-

-

Buorre ođas sidjiide geat vurdet lieggasit geassedálkki:

Váikko stuora osiin Finnmárkkus dál arvá, de orru nu ahte bearjadaga rájes bohtet lieggaset dálkkit.

Buot nuorttimus osiin Finnmárkkus, Mátta-Várjjagis lea leamaš fiertu maŋemuš beivviid, 25 lieggagráda ja beaivvádat. Eará báikkiin arvá ja lea mierká, muhto Meterologalaš instituhta meterologas Håvard Thorsetas leat buorit ođđasat Finnmárkku olbmuide. 

– Dál lea obbadálki stuora osiin Finnmárkkus odne ja ihttin, muhto bearjadat beaivvi mielde boahtá lieggaset áibmu nuortan, ja orru nu ahte šaddá čábbát dálki, lohká son.

Boahtte vahkku gaskamuddui

Mátta-Várjjagis bistá fiertu, ja bearjadaga rájes sáhttet eará finnmárkulaččat maid vuordit fierttu. Meterologa Håvard Thorset lohká lieggaset dálkki bistit boahtte vahkku gaskamuddui, ja eanaš beivviide lea vurdojuvvon birrasiid 20 gráda.

– Orru nu ahte šaddá sullii 20 gráda eanaš beivviid, muhto muhtin beivviid sáhttá dát leat veahá badjelis Sis-Finnmárkkus, lohká Thorset.

Molsašuddi dálki

Muhto váikko šaddáge čábbát dálki, ja vurdojuvvo fiertu bearjadaga rájes – de deattuha meterologa ahte lihkká sáhttá arvvestit.

– Šaddá rievttimielde molsašuddi dálki, nu ahte ii leat beaivvádat juohke beaivve. Lea gal eambbo fiertu go arvi, muhto sáhttá muhtin áigodagaid árvit ja sáhttet boahtit áigodagat go leat oavttit. Muhto eanas áigge orru oalle fiertu ja liekkas, muitala son. 

Lávvordaga dálkediehtu Finnmárkkus diibmu 14-20

Mátta-Várjjat: 20°

Deatnu: 22°

Unjárga: 18°

Guovdageaidnu: 18°

Kárášjohka: 20°

Máhkarávju: 18°

Leavdnja: 20°

Alta: 20°

(Dieđut: yr.no)

-Almmuhus-